ആമസോൺ പ്രൈമിന് വെല്ലുവിളിയായി ഫ്ലിപ്കാ‍ർട്ട് പ്ലസ്

ഏറ്റവും വലിയ ഇ-കൊമേഴ്സ് കമ്പനിയായ ഫ്ലിപ്കാർട്ട് സബ്സ്ക്രിപ്ഷൻ സർവീസ് രം​ഗത്തേയ്ക്ക്. ഫ്ലിപ്കാ‍ർട്ടിന്റെ പ്രധാന എതിരാളികളായ ആമസോണിന്റെ പ്രൈം സർവ്വീസിന് വെല്ലുവിളിയായാകും ഫ്ലിപ്കാ‍ർട്ട്, ഫ്ലിപ്കാ‍ർട്ട് പ്ലസ് എന്ന പേരിൽ സബ്സ്ക്രിപ്ഷൻ സർവീസ് ആരംഭിക്കുക.

ഫ്ലിപ്കാർട്ട് പ്ലസ് ആഗസ്റ്റ് 15ന് ആരംഭിക്കുമെന്നാണ് വിവരം. ഫ്ലിപ്കാർട്ടിന്റെ സ്ഥിരം ഉപഭോക്താക്കൾക്ക് സൗജന്യമായി ഈ സേവനം ലഭിക്കുന്നതാണ്.

സ്വന്തം പ്ലാറ്റ്ഫോമിലുള്ള ആനുകൂല്യങ്ങൾക്കു പുറമെ ഹോട്ട് സ്റ്റാർ, സൊമാറ്റോ, മെയ്ക്ക് മൈ ട്രിപ്, കഫെ കോഫി ഡേ തുടങ്ങിയ കമ്പനികളുടെ സേവനങ്ങളും ഫ്ലിപ്കാ‍ർട്ട് പ്ലസ് വഴി ലഭിക്കുന്നതാണ്. സാധനങ്ങൾ വാങ്ങുമ്പോൾ കൂടുതൽ ഡിസ്കൗണ്ടുകൾ, വേ​ഗതയേറിയ ഡെലിവറി എന്നിവയും ഫ്ലിപ്കാ‍ർട്ട് പ്ലസ് ഉപഭോക്താക്കൾക്ക് ലഭിക്കും.

ഈ പദ്ധതിയിലേയ്ക്ക് കൂടുതൽ കൺസ്യൂമർ ബ്രാൻഡുകളെ പങ്കാളികളാക്കാനുള്ള ശ്രമത്തിലാണ് ഫ്ലിപ്കാർട്ട് ഇപ്പോൾ. എന്നാൽ ഇ-കൊമേഴ്‌സ് സ്ഥാപനങ്ങള്‍ നല്‍കുന്ന വന്‍ വിലക്കിഴിവിന് സര്‍ക്കാര്‍ നിയന്ത്രണം ഏര്‍പ്പെടുത്തുമെന്ന് കഴിഞ്ഞ ദിവസം റിപ്പോ‍ർട്ടുകൾ പുറത്തു വന്നിരുന്നു. വിദേശ കമ്പനികൾ വലിയ തോതിൽ നിക്ഷേപം നടത്തുന്ന ഇന്ത്യൻ ഇ -കോമേഴ്സ് രം​ഗത്ത് പ്രാദേശിക ബിസിനസുകൾ പ്രോത്സാഹിപ്പിക്കുന്നതിന്റെ ഭാ​ഗമായാണ് സർക്കാരിന്റെ പുതിയ തീരുമാനം.

malayalam.goodreturns.in