രാജ്യത്തെ ടെലിവിഷൻ രം​ഗത്ത് വിപ്ലവം സൃഷ്ടിച്ച് റിലയൻസിന്റെ 'ജിയോ ഗിഗാ ടി.വി ഈ മാസം പുറത്തിറങ്ങും. കേരളത്തിൽ ഉൾപ്പെടെ പ്രമുഖ നഗരങ്ങളിൽ ഓഗസ്റ്റ് 15 മുതൽ ജിയോ ഹോം ടി.വി. ലഭ്യമായിത്തുടങ്ങും.

ഒരു റൗട്ടർ, ഒരു സെറ്റ് ടോപ്പ് ബോക്‌സ്, ഒരു ലാൻഡ് ഫോൺ എന്നിവയാണ് ജിയോ ടിവിയുടെ ഭാ​ഗമായി ഉണ്ടാകുക. വീടിന് സമീപ പ്രദേശത്ത് വരെ എത്തുന്ന ഒപ്ടിക്കൽ ഫൈബറിൽ നിന്ന്‌ ചെമ്പു കമ്പിയിലൂടെയാണ് വീട്ടിലേക്കുള്ള കണക്ഷൻ. ഒരു ജി.ബി.പി.എസ്. (1000 എം.ബി.പി.എസ്.) വേഗത്തിലാണ് ഈ ബ്രോഡ്ബാൻഡ് സംവിധാനത്തിലൂടെ ഡേറ്റ ലഭിക്കുന്നത്.

ഇതുവഴി അൾട്രാ ഹൈ ഡെഫിനിഷൻ ചിത്രങ്ങൾ പോലും ടെലിവിഷനിൽ വ്യക്തതയോടെ കാണാൻ ജിയോ അവസരമൊരുക്കും. ജിയോ നെറ്റ്‌വർക്കിലുള്ള ടെലിവിഷൻ സെറ്റുകൾക്ക് മുന്നിലിരുന്ന് പരസ്പരം വീഡിയോ കോളും ചെയ്യാവുന്നതാണ്.

കൂടാതെ ശബ്ദത്തിലൂടെ ടെലിവിഷനെ നിയന്ത്രിക്കാവുന്നതാണ്. റിമോട്ടിൽ ഒരു ബട്ടൺ അമർത്തി ചാനലിന്റെ പേര് പറഞ്ഞാൽ ടി.വി.യിൽ ആ ചാനൽ തെളിയും. ഇതുപോലെ തന്നെ വീഡിയോകളും വെബ് സൈറ്റുകളും സിനിമകളും സെർച്ച് ചെയ്യാം. ഏകദേശം 600 ചാനലുകൾ ജിയോ ടിവി വഴി ലഭിക്കും. വിവിധ ഭാഷകളിലുള്ള സിനിമകളുടെ വലിയ ശേഖരവും ജിയോ ടിവിയിലുണ്ട്. 

malayalam.goodreturns.in