കേരളത്തിൽ പെട്രോൾ, ഡീസൽ വിലകൾ റെക്കോഡ് ഉയരത്തിലേക്ക് കുതിക്കുന്നു. കൊച്ചി നഗരത്തിൽ ഡീസൽ വില വെള്ളിയാഴ്ച 73.97 രൂപയിലേക്ക് ഉയർന്നു. പെട്രോളിന് 80.46 രൂപയാണ് വില. പാചക വാതക വിലയും ഇന്നലെ 1.49 രൂപ വർദ്ധിപ്പിച്ചു.

മേയ് 30ന് രേഖപ്പെടുത്തിയ 81.32 രൂപ (പെട്രോൾ) യും 73.99 രൂപ (ഡീസൽ) യുമാണ് കൊച്ചി നഗരത്തിൽ ഇതുവരെയുള്ള റെക്കോഡ് വില. ഒരു മാസം കൊണ്ട് പെട്രോളിന് 2.26 രൂപയും ഡീസലിന് 2.52 രൂപയുമാണ് വർദ്ധിച്ചത്. കേരളത്തിൽ പ്രളയക്കെടുതിയ്ക്ക് പിന്നാലെയാണ് പെട്രോൾ, ഡീസൽ വില വർദ്ധനവ്. സംസ്ഥാനത്തിലെ ഈ പ്രത്യേക സാഹചര്യം കണക്കിലെടുത്ത് കേരളത്തെ വില വർദ്ധനയിൽ നിന്ന് തത്കാലത്തേക്കെങ്കിലും ഒഴിവാക്കണമെന്ന ആവശ്യവും ശക്തമായിട്ടുണ്ട്.

കൊച്ചിയിലേതിനേക്കാൾ ലിറ്ററിന് ശരാശരി ഒരു രൂപ കൂടുതലാണ് തിരുവനന്തപുരത്ത്. ഇന്നലെ തിരുവനന്തപുരത്ത് പലയിടത്തും ഡീസൽ വില 75 രൂപ കടന്നുവെന്നാണ് വിവരം. ഡൽഹിയിൽ ലിറ്ററിന് 70.21 രൂപയാണ് ഡീസൽ വില.

ആഗോള വിപണിയിൽ അസംസ്‌കൃത എണ്ണയുടെ വില ഉയരുന്നതും രൂപയുടെ മൂല്യം റെക്കോഡ് നിലവാരത്തിലേക്ക് ഇടിയുന്നതുമാണ് പെട്രോൾ, ഡീസൽ വില ഉയരാൻ കാരണം. ആഗോള വിപണിയിൽ ക്രൂഡോയിൽ വില ഇനിയും കൂടാൻ ഇടയുണ്ടെന്ന് അന്താരാഷ്ട്ര ഊർജ ഏജൻസി മുന്നറിയിപ്പ് നൽകിയിട്ടുണ്ട്.

malayalam.goodreturns.in