പെട്രോൾ, ഡീസൽ വില വീണ്ടും ഉയരത്തിലേയ്ക്ക്. പെട്രോള്‍ ലിറ്ററിന് 16 പൈസയും, ഡീസല്‍ ലിറ്ററിന് 19 പൈസയുമാണ് ഇന്ന് വര്‍ദ്ധിച്ചത്. ലിറ്ററിന് 79. 31 രൂപയാണ് ഡല്‍ഹിയിൽ ഇന്നത്തെ പെട്രോള്‍ വില, ഡീസലിന് 71. 34 രൂപയാണ് വില.

മുംബൈയില്‍ പെട്രോള്‍ വില ലിറ്ററിന് 86. 72 രൂപയായും, ഡീസല്‍ വില ലിറ്ററിന് 75. 74 രൂപയായും ഉയര്‍ന്നു. തിരുവനന്തപുരത്ത് പെട്രോള്‍ ലിറ്ററിന് 82. 7 രൂപയും, ഡീസലിന് ലിറ്ററിന് 76. 41 രൂപയുമാണ് വിലയുള്ളത്. കഴിഞ്ഞ അഞ്ച് മാസം കൊണ്ട് ഡീസല്‍ വില ലിറ്ററിന് 4.66 രൂപയും, പെട്രോള്‍ വില ലിറ്ററിന് 6. 35 രൂപയുമാണ് വര്‍ദ്ധിച്ചത്.

പെട്രോൾ, ഡീസൽ വിലയെ രൂപയുടെ വിനിമയ നിരക്ക് ഏറെ ബാധിക്കും. കാരണം ഇറക്കുമതിയെ വിനിമയ നിരക്ക് കാര്യമായി തന്നെ ബാധിക്കും. ക്രൂഡ് ഓയിലിന്റെയും മറ്റും ഇറക്കുമതി ഇന്ത്യയിൽ വെട്ടിച്ചുരുക്കാനാകില്ല. രൂപയുടെ മൂല്യം കുറയുന്നതോടെ പെട്രോൾ, ഡീസൽ വില ഇനിയും കുത്തനെ ഉയരാനാണ് സാധ്യത.

രൂപയുടെ മൂല്യം വീണ്ടും ഇടിയുകയും പെട്രോൾ ഡീസൽ വില വ‍ർദ്ധിക്കുകയും ചെയ്താൽ തീ‍ർച്ചയായും വിലക്കയറ്റവും രൂക്ഷമാകും. ഇന്ത്യയ്ക്കും ചൈനയ്ക്കുമാണ് നിലവിൽ എണ്ണയുടെ ആവശ്യം കൂടുതലുള്ളത്. വെനസ്വല പോലുള്ള രാജ്യങ്ങളില്‍ എണ്ണ ഉല്‍പ്പാദനം കുറഞ്ഞും വരികയാണ്.

malayalam.goodreturns.in