ഇന്ത്യയുടെ സമ്പത്തില്‍ 77.4ശതമാനവും വെറും 10 ശതമാനം ആളുകളില്‍ കുമിഞ്ഞു കൂടിയതായി സര്‍വേ റിപോര്‍ട്ട്. രാജ്യാന്തര അവകാശ സംഘടനയായ 'ഓക്‌സ്ഫാം'പുറത്തുവിട്ട സര്‍വേ റിപ്പോര്‍ട്ടിലാണ് രാജ്യത്തെ സാമ്പത്തിക അസമത്വം വര്‍ധിക്കുന്നതു സംബന്ധിച്ച ഞെട്ടിക്കുന്ന കണക്കുകളുള്ളത്.

കഴിഞ്ഞ ഒരു വര്‍ഷംകൊണ്ട് ഒരു ശതമാനം വരുന്ന അതിസമ്പന്നരുടെ സമ്പത്തില്‍ 36 ശതമാനമാണ് വര്‍ധനയുണ്ടായത്. അതേസമയം, രാജ്യത്തെ പകുതിയോളംവരുന്ന ദരിദ്രരുടെ സമ്പത്തിലുണ്ടായ വര്‍ധനവ് മൂന്നു ശതമാനം മാത്രമാണ്.

ഒരുവര്‍ഷത്തിനിടെ ഇന്ത്യയില്‍ 18 അതിസമ്പന്നരായ കോടിശ്വരന്മാര്‍ ഉണ്ടായതായും റിപ്പോര്‍ട്ടില്‍ സൂചിപ്പിക്കുന്നു. ഇതുവരെ 28 ലക്ഷം കോടി സമ്പത്തോടെ ആകെ 119 ശതകോടീശ്വരന്മാര്‍ ഇന്ത്യയിലായി. സാമ്പത്തിക തുല്യതയില്ലായ്മ ജനാധിപത്യത്തിന്റെ തകര്‍ച്ചയ്ക്ക് കാരണമായേക്കുമെന്നും റിപ്പോര്‍ട്ടില്‍ പറയുന്നു. വേള്‍ഡ് ഇക്കണോമിക് ഫോറം വാര്‍ഷിക സമ്മേളനത്തിന്റെ ഭാഗമായാണ് റിപ്പോര്‍ട്ട് അവതരിപ്പിച്ചത്.