ടെലികോം കമ്പനികളുടെ മത്സരം ഉപഭോക്താക്കള്‍ക്ക് അനുഗ്രഹമായി മാറുകയാണ്. ജിയോയുടെ 1699 രൂപയുടെ 365 ദിവസ പ്ലാനിനു മറുപടിയായി എയര്‍ടെല്ലും രംഗത്തെത്തി. അണ്‍ലിമിറ്റഡ് വോയ്‌സ് കോളും പ്രതിദിനം 1.5 ജിബി ഡാറ്റയും ഉപയോഗിക്കുന്നത് 1699 രൂപയുടെ ഓഫറാണ് ജിയോ പ്രഖ്യാപിച്ചിരുന്നത്. ഇതിനു മറുപടിയായി എയര്‍ടെല്‍ പ്രഖ്യാപിച്ച ഓഫര്‍ പരിശോധിക്കാം.

റോമിങിലും ലോക്കലിലും രാജ്യത്തിനകത്ത് അണ്‍ലിമിറ്റഡ് കോളുകള്‍, പ്രതിദിനം 100 എസ്എംഎസ്ഉം ഒരു ജിബി ഡാറ്റയും. കൂടാതെ എയര്‍ടെല്‍ ടിവിയുടെ പ്രീമിയം സബ്‌സ്‌ക്രിപ്ഷന്‍ പാക്കേജ് കാലാവധിയായ ഒരു വര്‍ഷത്തേക്ക് തീര്‍ത്തും സൗജന്യമായി ലഭിക്കുകയും ചെയ്യും. അണ്‍ലിമിറ്റഡ് കോളുകളുടെ കാര്യത്തില്‍ ഒരു പരിധിയും നിശ്ചയിച്ചിട്ടില്ലെന്നതാണ് പാക്കേജിന്റെ മറ്റൊരു പ്രത്യേകത.

എന്നാല്‍ എയര്‍ടെല്ലിനു മുമ്പെ മത്സരത്തിനിറങ്ങിയ വോഡഫോണും ബിഎസ്എന്‍എല്ലും ഇതിനു സമാനമായ പാക്കേജുകള്‍ പുറത്തിറക്കിയിട്ടുണ്ട്. വോഡഫോണിന്റെ 1499 രൂപയുടെ പാക്കേജ് ഒരു വര്‍ഷത്തേക്ക് അണ്‍ലിമിറ്റഡ് കോളുകളും പ്രതിദിനം 100എസ്എംഎസും ഒരുജിബി ഡാറ്റയും നല്‍കുന്നുണ്ട്. വോഡഫോണിന്റെ പ്ലേ ആപ്പും ഈ കാലയളവില്‍ സൗജന്യമായിരിക്കും.

1312 രൂപയുടെ റീച്ചാര്‍ജ് പ്ലാനാണ് ബിഎസ്എന്‍എല്‍ മുന്നോട്ടു വെച്ചിട്ടുള്ളത്. അണ്‍ലിമിറ്റഡ് വോയ്‌സ് കോളും 5ജിബി ഡാറ്റയും 1000 എസ്എംഎസും ഉള്‍പ്പെടുന്നതാണ് ഓഫര്‍. എന്തായാലും ഇന്ത്യന്‍ മൊബൈല്‍ താരിഫ് രംഗത്ത് വന്‍ മാറ്റമാണ് ജിയോയുടെ കടന്നു വരവോടു കൂടി ഉണ്ടായിട്ടുള്ളത്.