മുംബൈ: ഡെന് നെറ്റ് വര്ക്ക്, ഹാത്ത് വേ കമ്പനികളുടെ നിയന്ത്രണം ഏറ്റെടുക്കാനുള്ള റിലയന്സ് കമ്പനിയുടെ നീക്കത്തിന് കോംപറ്റീഷന് കമ്മീഷന് ഓഫ് ഇന്ത്യയുടെ(സിസിഐ) പച്ചക്കൊടി.
കഴിഞ്ഞ ഒക്ടോബറിലാണ് റിലയന്സ് സുപ്രധാനമായ ഈ പ്രഖ്യാപനം നടത്തിയത്. ഡെന് നെറ്റ് വര്ക്കിലെ 66 ശതമാനം ഓഹരികള് ഏകദേശം 2045 കോടി രൂപയ്ക്കും ഹാത്ത് വേ കേബിള് ആന്റ് ഡാറ്റാ കോമിന്റെ 51.3 ശതമാനം ഓഹരികള് 2940 കോടി രൂപയ്ക്കുമാണ് മുകേഷ് അംബാനിയുടെ കമ്പനി സ്വന്തമാക്കുന്നത്.
ഡിജിറ്റല് കേബിള് സേവനം അഞ്ചു കോടി വീടുകളിലേക്കെത്തിക്കാനുള്ള റിലയന്സിന്റെ നീക്കത്തിന് ഈ ഏറ്റെടുക്കല് കരുത്തു പകരുമെന്നുറപ്പാണ്. ഫലത്തില് ഈ ഏറ്റെടുക്കല് ഡെന്നിനും ഹാത്ത് വേയ്ക്കും ആശ്വാസമാവുകയാണ് ചെയ്യുന്നത്. ജിയോ ഗിഗാ ഫൈബര് പ്രഖ്യാപിച്ചത് ഏറ്റവും കൂടുതല് തിരിച്ചടി നല്കിയത് ഡെന്നിനും ഹാത്ത് വേയ്ക്കും തന്നെയായിരുന്നു.
ജിയോയുടെ കടന്നു വരവിനെ ചെറുക്കാന് ഭാരത് ഫൈബര് എന്ന പേരില് ബിഎസ്എന്എല്ലും സേവനങ്ങള് പ്രഖ്യാപിച്ചിട്ടുണ്ട്. ഒരു ജിബിപിഎസ് വേഗതയില് ജിയോ ഗിഗാ ഫൈബര് എത്തുന്നത് തീര്ച്ചയായും വന് മാറ്റങ്ങളാണ് ഉണ്ടാക്കാന് പോകുന്നത്. ഏപ്രിലോടു കൂടി ഗിഗാ ഫൈബര് കേരളത്തിലെ വീടുകളിലും എത്തുമെന്നാണ് കമ്പനി കേന്ദ്രങ്ങള് നല്കുന്ന വിവരം.