ദില്ലി: കാന്‍സര്‍ ബാധയെ തുടര്‍ന്ന് ന്യുയോര്‍ക്ക് ആശുപത്രിയില്‍ ചികില്‍സയില്‍ കഴിയുന്ന കേന്ദ്ര ധനകാര്യ മന്ത്രി അരുണ്‍ ജെയിറ്റ്‌ലിക്ക് താല്‍ക്കാലിക പകരക്കരനായി റെയില്‍വേ മന്ത്രി പിയൂഷ് ഗോയലിനെ കേന്ദ്രസര്‍ക്കാര്‍ നിയമിച്ചു. പ്രധാനമന്ത്രി നരേന്ദ്രമോദിയുടെ നിര്‍ദ്ദേശപ്രകാരം പ്രസിഡന്റ് രാം നാഥ് കോവിന്ദാണ് ഇതുമായി ബന്ധപ്പെട്ട പ്രഖ്യാപനം നടത്തിയത്. രോഗബാധയെ തുര്‍ന്ന് ജനുവരി 13ന് അമേരിക്കയിലേക്ക് തിരിച്ച ജെയിറ്റ്‌ലി 22നാണ് ശസ്ത്രക്രിയക്ക് വിധേയനായത്.

വരാനിരിക്കുന്ന പൊതുതെരഞ്ഞെടുപ്പിന് മുന്നോടിയായി അവതരിപ്പിക്കുന്ന ഇടക്കാല ബജറ്റില്‍ കര്‍ഷകര്‍ക്ക് പ്രത്യേക പാക്കേജുകളും മിഡില്‍ക്ലാസിന് വേണ്ടിയുള്ള സുപ്രധാന ആനുകൂല്യങ്ങളും പ്രഖ്യാപിക്കുമെന്നാണ് വിലയിരുത്തപ്പെടുന്നത്. ജെയിറ്റ്‌ലി ഇതിനകം അഞ്ച് തവണ ബജറ്റ് അവതരിപ്പിക്കുകയുണ്ടായി.

ഇത് രണ്ടാംതവണയാണ് പിയൂഷ് ഗോയല്‍ റെയില്‍വേ മന്ത്രാലയത്തിനൊപ്പം ധനകാര്യമന്ത്രാലയത്തിന്റെയും ചുമതല വഹിക്കുന്നത്. കഴിഞ്ഞ മെയില്‍ ജെയിറ്റ്‌ലി കിഡ്‌നി മാറ്റിവയ്ക്കല്‍ ശസ്ത്രക്രിയയ്ക്ക് വിധേയനായപ്പോഴായിരുന്നു ഇത്. അന്ന് 100 ദിവസമാണ് രണ്ട് മന്ത്രാലയത്തിന്റെയും ചുമതല ഗോയല്‍ വഹിച്ചത്.  ലോകസഭാ തെരഞ്ഞെടുപ്പിന്റെ പ്രചാരണ പ്രവര്‍ത്തനങ്ങളുടെ ഇന്‍ചാര്‍ജ്ജായി ബിജെപി നേരത്തേ ജെയിറ്റ്‌ലിയെ ചുമതലപ്പെടുത്തിയിരുന്നു.