കണ്ണൂര്‍: കണ്ണൂര്‍ അന്താരാഷ്ട്ര വിമാനത്താവളത്തില്‍ നിന്ന് ഇന്‍ഡിഗോഎയര്‍ലൈന്‍സിന്റെ ആദ്യ വിമാനം പറന്നുയര്‍ന്നു. ചെലവ് കുറഞ്ഞ ഉഡാന്‍ പദ്ധതിയില്‍ ആരംഭിച്ച ആദ്യ സര്‍വീസ് ഹൈദരാബാദിലേക്കാണ് നടത്തിയത്. ഇന്‍ഡിയോയുടെ 6ഇ 7168 വിമാനമാണ് ഇന്ന് സര്‍വീസ് നടത്തിയത്. 1299 രൂപയായിരുന്നു ടിക്കറ്റിന്റെ കുറഞ്ഞ നിരക്ക്.

വാദ്യമേളങ്ങളുടെ അകമ്പടിയോടെ ആദ്യ യാത്രക്കാരെ വിമാനത്താവളത്തില്‍ വരവേറ്റ ശേഷമായിരുന്നു യാത്ര. ആദ്യ യാത്രക്കാരന് കിയാല്‍ വക സമ്മാനവും നല്‍കി. കിയാല്‍ എംഡി വി തുളസീദാസ്, എയര്‍പോര്‍ട്ട് സിഇഒ ഉത്പല്‍ ബറുവ, ഇന്‍ഡിഗോ വൈസ് പ്രസിഡന്റ് സിന്‍ഡി സദോസ്‌കിയേസ്‌കി, ഇന്‍ഡിഗോ അസോസിയറ്റഡ് വൈസ് പ്രസിഡന്റ് രവി ചന്ദ്ര തുടങ്ങിയവര്‍ ചേര്‍ന്ന് ദീപം കൊളുത്തിയായിരുന്നു ഉദ്ഘാടന കര്‍മം നിര്‍വഹിച്ചത്. ഹൈദരാബാദിനു പുറമെ, ചെന്നൈ, ഹുബ്ബള്ളി, ബംഗളൂരു, ഗോവ എന്നീ പ്രധാന നഗരങ്ങളിലേക്കും പ്രതിദിന ഉഡാന്‍ സര്‍വീസുകള്‍ ഇന്‍ഡിഗോ നടത്തുന്നുണ്ട്.

ചെലവ് കുറഞ്ഞ ആഭ്യന്തര സര്‍വീസുകള്‍ക്ക് അവസരമൊരുക്കുന്ന കേന്ദ്രസര്‍ക്കാര്‍ പദ്ധതിയായ ഉഡാന്‍ സര്‍വീസ് ഈയിടെയാണ് കണ്ണൂര്‍ വിമാനത്താവളത്തിന് അനുവദിച്ചുകിട്ടിയത്. സര്‍വീസ് വ്യവസ്ഥകളില്‍ കണ്ണൂര്‍ വിമാനത്താവളത്തിന് കേന്ദ്ര സര്‍ക്കാര്‍ പ്രത്യേകമായി ഇളവുകള്‍ അനുവദിച്ചതിനെത്തുടര്‍ന്നായിരുന്നു ഇത്. ഉഡാന്‍ റൂട്ടുകളില്‍ മൂന്നുവര്‍ഷത്തേക്ക് മറ്റു സര്‍വീസുകള്‍ അനുവദിക്കില്ലെന്ന വ്യവസ്ഥയാണ് കിയാലിനായി ഇളവുചെയ്തത്. പകുതി ടിക്കറ്റുകളാണ് ഉഡാന്‍ നിരക്കില്‍ ലഭിക്കുക.

ദോഹയിലേക്കും കുവൈത്തിലേക്കും രാജ്യാന്തര സര്‍വീസും ഇന്‍ഡിഗോ മാര്‍ച്ച് 15ന് തുടങ്ങും. ഇതിനുള്ള ടിക്കറ്റ് ബുക്കിംഗ് ആരംഭിച്ചുകഴിഞ്ഞു. ആഴ്ചയില്‍ ആറു ദിവസമാണ് സര്‍വീസ്. കണ്ണൂര്‍ വിമാനത്താവളത്തിന് യാത്രക്കാരില്‍ നിന്ന് ലഭിച്ച മികച്ച പ്രതികരണമാണ് കൂടുതല്‍ സര്‍വീസുകള്‍ തുടങ്ങാന്‍ അധികൃതര്‍ക്കും എയര്‍ലൈന്‍സുകള്‍ക്കും പ്രേരണയാവുന്നത്.