Click it and Unblock the Notifications
ന്യൂഡല്ഹി: കേന്ദ്ര സര്ക്കാറിന്റെ പുതിയ ഇ കൊമേഴ്സ് നിയമങ്ങള് നിലവില് വന്നതോടെ ആമസോണ് ഉള്പ്പെടെയുള്ള ഓണ്ലൈന് വ്യാപാര സ്ഥാപനങ്ങള് തങ്ങളുടെ ഇന്ത്യന് വെബ്സൈറ്റില്നിന്ന് നിരവധി ഉത്പന്നങ്ങള് പിന്വലിച്ചു. ഇടത്തരം, ചെറുകിട വ്യാപാരികളെ ലക്ഷ്യം വെച്ച് വിപണിയില് എത്തിച്ചിരുന്ന ഉല്പന്നങ്ങളാണ് പിന്വലിച്ചത്. ഇ കൊമേഴ്സ് സ്ഥാപനങ്ങള് തങ്ങളുടെ ഉത്പന്നങ്ങള് കടകളിലൂടെ വിറ്റഴിക്കാന് പാടില്ലെന്ന പുതിയ ഓണ്ലൈന് വ്യാപാര നയത്തിലെ ചട്ടം നിലവില് വന്നതിനെ തുടര്ന്നാണിത്.
പച്ചക്കറികള്, സണ് ഗ്ലാസ്സുകള്, ഫ്ളോര് ക്ലീനേഴ്സ്, വസ്ത്രങ്ങള്, തുടങ്ങിയ ഉല്പ്പന്നങ്ങളാണ് വെബ്സൈറ്റില് നിന്ന് ആമസോണ് ഒഴിവാക്കിയത്.
ഇന്ത്യയിലെ ചെറുകിട വ്യാപാര മേഖലയെ സംരക്ഷിക്കുകയെന്ന ലക്ഷ്യത്തോടെയാണ് പുതിയ ഓണ്ലൈന് വ്യാപാര നയം നടപ്പിലാക്കിയത്. തങ്ങളുടെ ഉല്പ്പന്നങ്ങള് തങ്ങള്ക്ക് മൂലധന നിക്ഷേപമുള്ള ഷോപ്പുകളിലൂടെ വില്ക്കരുതെന്ന് മാത്രമല്ല, ഓണ്ലൈന് സ്ഥാപനങ്ങള് തങ്ങളുടെ ഉല്പ്പന്നങ്ങള് മാത്രം വില്ക്കണമെന്ന് വ്യാപാരികളുമായി കരാറിലെത്താന് പാടില്ലെന്നും പുതിയ നിയമം അനുശാസിക്കുന്നുണ്ട്.
ആമസോണിന് നേരിട്ടല്ലാതെ മുതല് മുടക്കുള്ള ക്ലൗഡ് ടെയില് പോലുള്ള വില്പ്പനക്കാര് നിരവധി ഉല്പ്പന്നങ്ങള് ഇതിനകം പിന്വലിച്ചുകഴിഞ്ഞു. ആമസോണ് പാന്ട്രിയും സര്വീസ് നിര്ത്തി.
അതേസമയം കേന്ദ്ര നയത്തിലുള്ള അതൃപ്തി ആമസോണ് ഉള്പ്പെടെയുള്ള സ്ഥാപനങ്ങള് തുറന്നു പ്രകടിപ്പിച്ചു. ഉപഭോക്താക്കളായിരിക്കും ഈ നീക്കത്തിന് നഷ്ടം സഹിക്കേണ്ടി വരികയെന്നായിരുന്നു ആമസോണിന്റെ പ്രതികരണം. അതേസമയം, പുതിയ നിയമവുമായി സഹകരിക്കുമെന്നും കമ്പനി അറിയിച്ചു.
Sign in with Google