ന്യൂഡല്ഹി: മുകേഷ് അംബാനിയുടെ ജിയോ ഇന്ഫോ കോം വന്നതോടെ തകര്ന്നു തരിപ്പണമായ അനുജന് അനില് അംബാനിയുടെ റിലയന്സ് കമ്മ്യൂണിക്കേഷന്സ് അതിന്റെ ആസ്തികളെല്ലാം വില്ക്കാനൊരുങ്ങുന്നു. കമ്പനിയുടെ ഏഴ് ബില്യന് ഡോളര് വരുന്ന കടബാധ്യത തീര്ക്കാനാണ് ഇത്തരമൊരു നിര്ദ്ദേശവുമായി അനില് അംബാനി രംഗത്തെത്തിയിരിക്കുന്നത്.
കടങ്ങള് വീടാനുള്ള ശ്രമങ്ങള് പരാജയപ്പെട്ട പശ്ചാത്തലത്തില് പാപ്പരായി പ്രഖ്യാപിക്കുന്നതിനുള്ള നടപടികളുടെ ഭാഗമായി നാഷനല് കമ്പനി ലോ ട്രിബ്യൂണലിനെ (എന്സിഎല്ടി) സമീപിക്കുമെന്ന് കഴിഞ്ഞയാഴ്ച അനില് അംബാനി പറഞ്ഞിരുന്നു.
അതിനിടെ, ടെലികോം വകുപ്പില് നിന്ന് റിലയന്സ് വാങ്ങിയ സ്പെക്ട്രം ജിയോയ്ക്ക് നല്കി കടബാധ്യതകള് തീര്ക്കാന് ശ്രമം നടത്തിയിരുന്നുവെങ്കിലും അതുംവിജയിച്ചിട്ടില്ല. ഇതുവഴി 975 കോടി രൂപ ലഭിക്കുമെന്നായിരുന്നു അംബാനിയുടെ കണക്കുകൂട്ടല്. ഇതുപയോഗിച്ച് എറിക്സണ് നല്കാനുള്ള 550 കോടിയും മൈനോറിറ്റി സ്റ്റേക്ക് ഹോള്ഡറായ റിലയന്സ് ഇന്ഫ്രാടെല്ലിന് നല്കാനുള്ള 230 കോടിയും കൊടുത്തുതീര്ക്കാനായിരുന്നു പദ്ധതി. എന്നാല് സ്പെക്ട്രം പദ്ധതിയുമായി ബന്ധപ്പെട്ട് ടെലകോം വകുപ്പിന് നല്കേണ്ടിവരുന്ന ബാധ്യതള് ഏറ്റെടുക്കാന് മുകേഷ് അംബാനിയുടെ ജിയോ വിസമ്മതിച്ചതോടെ ഈ പ്രതീക്ഷയും അസ്തമിക്കുകയായിരുന്നു.
അതേസമയം, തങ്ങള്ക്ക് നല്കാനുള്ള കടം വീട്ടുന്നതില് പരാജയപ്പെട്ട റിലയന്സിന്റെ ആസ്തികള് കണ്ടുകെട്ടണമെന്നാവശ്യപ്പെട്ട് സുപ്രിംകോടതിയെ സമീപിക്കാനിരിക്കുകയാണ് എറിക്സണ്. ഇതുമായി ബന്ധപ്പെട്ട് സുപ്രിംകോടതിയുടെ മുന് ഉത്തരവ് നടപ്പിലാക്കുന്നതില് അനില് അംബാനി പരാജയപ്പെട്ട സാഹചര്യത്തിലാണ് തങ്ങള് ഈ ആവശ്യവുമായി കോടതിയെ സമീപിക്കുന്നതെന്ന് സ്വീഡിഷ് കമ്പനിയായ എറിക്സണ് വ്യക്തമാക്കി.