തന്റെ ഇ കൊമേഴ്‌സ് സംരംഭം ഉടനെയെന്ന് മുകേഷ് അംബാനി; മൂന്ന് കോടി പേര്‍ക്ക് തൊഴില്‍ നല്‍കും

നിലവില്‍ ജിയോയ്ക്ക് 300 ദശലക്ഷം വരിക്കാരുണ്ട്. ഇതിനു പുറമെ രാജ്യത്തെ 6500 നഗരങ്ങളിലായി 10000ത്തിലേറെ റീട്ടെയില്‍ കേന്ദ്രങ്ങളും റിലയന്‍സിനുണ്ട്. ഓണ്‍ലൈന്‍ വ്യാപാര രംഗത്തേക്ക് റിലയന്‍സ് പ്രവേശിക്കുന്നതോടെ നിലവിലെ വമ്പന്‍മാരായ ആമസോണിനും വാള്‍മാര്‍ട്ടിന്റെ കീഴിലുള്ള ഫ്‌ളിപ്കാര്‍ട്ടിനും അത് വലിയ വെല്ലുവിളിയാവുമെന്നാണ് കരുതപ്പെടുന്നത്. പ്രത്യേകിച്ച് ഇന്ത്യന്‍ സ്ഥാപനമെന്ന നിലയ്ക്ക് വിദേശ കമ്പനികള്‍ക്കുള്ള എഫ്ഡിഐ നിയന്ത്രണങ്ങളൊന്നും റിലയന്‍സിനെ ബാധിക്കുകയുമില്ല.

മികച്ച ഇന്റര്‍നെറ്റ് സേവനങ്ങളുമായി ജിയോ രാജ്യത്തെ ഞെട്ടിച്ച പോലെ മുകേഷ് അംബാനിയുടെ പുതിയ ഓണ്‍ലൈന്‍ വ്യാപാര സംരംഭവും വലിയ സംഭവമായി മാറുമെന്ന കണക്കുകൂട്ടലിലാണ് വ്യാപാരരംഗം. 30 കോടിയിലേറെ വരുന്ന ജിയോ ഉപഭോക്താക്കള്‍ കൈയിലുള്ളപ്പോള്‍ ഇ കൊമേഴ്‌സ് സംരംഭത്തിന്റെ പരസ്യം റിലയന്‍സിന് ഒരു വെല്ലുവിളിയാവില്ല. മാത്രമല്ല, ഉല്‍പ്പന്നങ്ങളുടെ വിതരണം, സപ്ലൈ ചെയിന്‍, ചില്ലറ ഔട്ട്‌ലെറ്റുകള്‍ എന്നിവ കണ്ടെത്താനും റിലയന്‍സിന് പ്രയാസമുണ്ടാവില്ലെന്നാണ് വിലയിരുത്തല്‍.