ടാറ്റാ മോട്ടേഴ്സ് ലിമിറ്റഡ് ഈ സാമ്പത്തിക വർഷത്തിലെ മൂന്നാം പാദത്തിൽ 26,961 കോടി രൂപയുടെ നഷ്ടമാണ് നേരിട്ടത്. കമ്പനിയുടെ ഉടമസ്ഥതയിലുള്ള ബ്രിട്ടീഷ് കമ്പനിയായ ജാഗ്വർ ലാൻഡ് റോവർ (ജെഎ‍ൽആർ) നേരിട്ട സാമ്പത്തിക പ്രതിസന്ധിയാണ് നഷ്ടം രേഖപ്പെടുത്താൻ കാരണം. 2017 ഡിസംബർ അവസാനത്തിൽ കമ്പനിയുടെ ലാഭം 1,214.60 കോടി രൂപയായിരുന്നു.ഒക്ടോബർ-ഡിസംബർ കാലയളവിൽ കമ്പനിയുടെ മൊത്തവരുമാനം 5 ശതമാനം ഉയർന്ന് 77,001 കോടി രൂപയിലെത്തിയിരുന്നു.

സ്റ്റോക്ക് എക്സ്ചേഞ്ച് ഫയലിംഗിൽ,"ഞങ്ങളുടെ മൂലധന നിക്ഷേപത്തിന്റെ പുസ്തക മൂല്യം കുറയ്ക്കുന്നതിന് ഞങ്ങൾ ഒരു നോൺ-ക്യാഷ് നിരക്കാണ് പ്രഖ്യാപിക്കുന്നത് എന്ന് ടാറ്റ മോട്ടോഴ്സ് പറഞ്ഞിരുന്നു. മൊത്തം ഓഹരികളുടെ മൂല്യമായ മാർക്കറ്റ് ക്യാപിറ്റലൈസേഷനിൽ 9123.41 കോടിയാണ് നഷ്ടം. ടാറ്റ ഓഹരിയുടെ തകർച്ച സെൻസെക്സ്, നിഫ്റ്റി സൂചികകൾക്കും തിരിച്ചടിയായി. സെൻസെക്സ് 424.61 പോയിന്റും നിഫ്റ്റി 125.80 പോയിന്റും കുറഞ്ഞു. ലോഹ വ്യവസായം, വാഹന വ്യവസായം തുടങ്ങിയ മേഖലകളിലെ ഓഹരികൾ വൻ തിരിച്ചടി നേരിട്ടു.

ടാറ്റ മോട്ടോഴ്‌സിന്റെ വരുമാനത്തിൽ 72 ശതമാനവും ജെഎൽആറിൽ നിന്നാണ് ലഭിക്കുന്നത്. എന്നാൽ 2018 ജെഎൽആറിന് അത്ര നല്ല വർഷമല്ലായിരുന്നു. ഡീസൽ വാഹനങ്ങൾക്കുള്ള ഡിമാൻഡ് കുറഞ്ഞതും ചൈനയിലെ ബിസിനസ് തളർച്ചയും ബ്രെക്സിന്റെ ചുറ്റിപ്പറ്റിയുള്ള അനിശ്ചിതാവസ്ഥയും ജെഎൽആറിന് തിരിച്ചടിയായ ഘടകങ്ങളായിരുന്നു.