മുംബൈ: യുപിഐ ഐഡി ഉപയോഗിച്ചുള്ള ഡിജിറ്റല്‍ പേയ്‌മെന്റ് ട്രാന്‍സാക്ഷന്‍ വര്‍ദ്ധിച്ചു വരുന്ന കാലമാണിത്. എന്നാല്‍ ഈ അവസരം മുതലാക്കാന്‍ ഓണ്‍ലൈന്‍ തട്ടിപ്പുകാരും സജീവമായി രംഗത്തുണ്ട്. അത്തരം പുതിയൊരു തട്ടിപ്പിനെതിരേയുള്ള മുന്നറിയിപ്പുമായി രംഗത്തെത്തിയിരിക്കുകയാണ് റിസര്‍വ് ബാങ്ക് ഓഫ് ഇന്ത്യ.

എനി ഡെസ്‌ക് എന്ന മൊബൈല്‍ ആപ്പിലൂടെ നിങ്ങളുടെ മൊബൈല്‍ കണ്‍ട്രോള്‍ ഏറ്റെടുത്താണ് ഈ തട്ടിപ്പ് നടത്തുന്നത്. തട്ടിപ്പുകാര്‍ നിങ്ങളോട് ആദ്യം എനി ഡെസ്‌ക് എന്ന അപ്ലിക്കേഷന്‍ പ്ലേ സ്റ്റോറില്‍ നിന്നും ഇന്‍സ്റ്റാള്‍ ചെയ്യാന്‍ ആവശ്യപ്പെടും. എനി ഡെസ്‌കിനു സമാനമായ ഒട്ടേറെ ആപ്പുകളും ലഭ്യമാണ്. ചിലപ്പോള്‍ മറ്റു ചില അപ്ലിക്കേഷന്റെ പേരുകളായിരിക്കും തട്ടിപ്പുകാര്‍ ഇന്‍സ്റ്റാള്‍ ചെയ്യാനായി ആവശ്യപ്പെടുക.

ഇതനുസരിച്ച് ആപ്പ് ഡൗണ്‍ലോഡ് ചെയ്താല്‍ ആപ്പ് കണക്ടാകാനുള്ള ഒമ്പതക്ക നമ്പര്‍ ഇരയില്‍ നിന്നു കൈക്കലാക്കുന്നതാണ് തട്ടിപ്പുകാരുടെ രീതി. ഇത് നിങ്ങള്‍ ഷെയര്‍ ചെയ്യുന്നതോടെ മൊബൈലിന്റെ നിയന്ത്രണം തട്ടിപ്പു സംഘത്തിന്റെ കൈയിലാകുന്നു. സാധാരണ രീതിയില്‍ ഏത് മൊബൈല്‍ ആപ്പും ചോദിക്കുന്ന പോലെ ഇന്‍സ്റ്റാള്‍ ചെയ്യുന്നതിനു മുമ്പ് ഏതാനും പെര്‍മിഷനുകള്‍ നല്‍കാന്‍ ആപ്പ് നമ്മോട് ആവശ്യപ്പെടും. പതിവ് പോലെ നാം ആക്‌സപ്റ്റ് ടിക്ക് ചെയ്യുന്നതോടെ നമ്മുടെ മൊബൈലില്‍ നുഴഞ്ഞു കയറി മറ്റു അപ്ലിക്കേഷന്‍ സെറ്റിംഗ്‌സില്‍ മാറ്റങ്ങള്‍ വരുത്താനും അവ ഉപയോഗിക്കാനും തട്ടിപ്പുകാര്‍ക്ക് സാധിക്കും.

ഇതുവഴി നിങ്ങളുടെ പെയ്‌മെന്റ് ആപ്പില്‍ കയറാനും ഡിജിറ്റല്‍ ട്രാന്‍സാക്ഷന്‍ നടത്താനും അവര്‍ക്ക് നിഷ്പ്രയാസം കഴിയും. സാങ്കേതികമായി നോക്കുമ്പോള്‍ അത് നിങ്ങളുടെ ഡിവൈസില്‍ നിങ്ങള്‍ ചെയ്ത ട്രാന്‍സാക്ഷനാണ്. പേടിഎം പോലുള്ള വാലറ്റ് ആപ്പുകളില്‍ നിന്നും ഈ രീതിയില്‍ തട്ടിപ്പുകള്‍ വ്യാപകമായി നടക്കുന്നുണ്ട്. എല്ലാ ബാങ്കുകളോടും ഇത്തരത്തിലുള്ള തട്ടിപ്പുകള്‍ തടയുന്നതിനു വേണ്ട നടപടികളും ബോധവല്‍ക്കരണ പരിപാടികളും സ്വീകരിക്കാനാണ് റിസര്‍വ് ബാങ്ക് സര്‍ക്കുലറിലൂടെ ആവശ്യപ്പെട്ടിരിക്കുന്നത്.