ചൈനീസ് ടെലികോം രംഗത്തെ പ്രമുഖ കമ്പനിയായ ഹുവായിയുടെ അഭിപ്രായമനുസരിച്ച് വരുന്ന 10 വര്‍ഷത്തിനുള്ളില്‍ ലോകത്തിലെ ഏറ്റവും വലിയ രണ്ടാമത്തെ 5 ജി വിപണിയായി രാജ്യം മാറും. വളര്‍ന്നു വരുന്ന ഒരു വിപണിയാണ് ഇന്ത്യയുടേത്. ദീര്‍ഘ കാലത്തേക്ക് വിലയിരുത്തുമ്പോള്‍ ചൈനയ്ക്ക് ശേഷം രണ്ടാമതായി ഇന്ത്യയുടെ 5ജി വിപണി മാറുമെന്ന് വിശ്വസിക്കുന്നതായി ഹുവായ് ടെക്‌നോളജിയിലെ തെക്കു-കിഴക്കന്‍ ഏഷ്യന്‍ മേഖലയിലെ പ്രസിഡന്റ് ജെയിംസ് വൂ പറഞ്ഞു. ദീര്‍ഘകാല വിലയിരുത്തലിനായി 10 വര്‍ഷത്തെ കാലയളവാണ് കണക്കാക്കുന്നത്.

തെക്കു കിഴക്കന്‍ ഏഷ്യന്‍ മേഖലയിലെ ഒന്നാമത്തെ 5 ജി വിപണിയായി ഹോങ്കോങ്ങാണ് കണക്കാക്കുന്നത്, തായ്‌ലന്‍ഡും ഇന്ത്യയും വിയറ്റ്‌നാമും ഹോങ്കോങ്ങിനെ പിന്തുടരുകയും 5 ജിയില്‍ ചുവടുറപ്പിക്കുമെന്നും അദ്ദേഹം കൂട്ടിച്ചേര്‍ത്തു. ഇന്ത്യന്‍ ടെലികോം ഓപ്പറേറ്റര്‍മാരുമായി ഭാവിയില്‍ ഇതിനായി പ്രവര്‍ത്തിക്കുമെന്നും അതൊടൊപ്പം തന്നെ പ്രാദേശിക ടെലികോം ഓപ്പറേറ്റര്‍മാരുമായി ഈ വര്‍ഷം പകുതിയോടെ പ്രവര്‍ത്തനമാരംഭിക്കുമെന്നും അദ്ദേഹം പറഞ്ഞു. ഇതിനായി ടെലികോം ഓപ്പറേറ്റര്‍ പങ്കാളികളോടൊപ്പം കമ്പനി സ്‌പെക്ട്രം അനുവദിക്കുന്നതിനുള്ള അംഗീകാരത്തിനായി കാത്തിരിക്കുകയാണ്.

സുരക്ഷ സംബന്ധിച്ച ആശങ്കകള്‍ പരിഹരിക്കുന്നതിനായി ഇന്ത്യയിലെ എല്ലാ ഓഹരിയുടമകളോടും സംസാരിക്കാനും വിപുലമായ ചര്‍ച്ചകള്‍ വഴി അവരുമായി ആശയവിനിമയം നടത്താനും കമ്പനി തയ്യാറാണ്. ഇന്ത്യന്‍ ഓഹരി വിപണി വെല്ലുവിളികള്‍ നിറഞ്ഞതും സവിശേഷ സ്വഭാവമുള്ളതാണെങ്കില്‍ കൂടി ഹുവായുടെ പ്രധാന വിപണിയാണ് കണക്കാക്കുന്നത്. കാരണം ഇന്ത്യയിലെ വലിയ ജനസംഖ്യ നിരക്കും ഉയര്‍ന്ന ടെലികോം ഡിമാന്റും ഹുവായെ സംബന്ധിച്ചിടത്തോളം ആകര്‍ഷകമായ ഘടകങ്ങളാണ്. ഹുവായിക്ക് ദീര്‍ഘകാല പദ്ധതിയാണ് ഇന്ത്യയിലുള്ളതെന്നതിനാല്‍ സര്‍ക്കാര്‍ സഹായിച്ചാല്‍ സാമ്പത്തിക മേഖലയില്‍ വന്‍ നിക്ഷേപം ഹുവായ് നടത്തുമെന്നും വുഇ പറഞ്ഞു

യുഎസ് പോലുള്ള പാശ്ചാത്യ വിപണികളില്‍ നിന്നും ഉയര്‍ന്നു വരുന്ന സുരക്ഷാ സംബന്ധമായ പ്രശ്‌നങ്ങളെ കുറിച്ച് ചര്‍ച്ച ചെയ്യാന്‍ ഹുവായ് പ്രാദേശിക സംഘങ്ങള്‍ ഇന്ത്യയിലെ സര്‍ക്കാര്‍ സ്ഥാപനങ്ങളിലും ടെലികോം ഓപ്പറേറ്ററുകളുമായി ബന്ധപ്പെട്ടുവെന്നും വു കൂട്ടിച്ചേര്‍ത്തു.