പോളിംഗ് അവസാനിക്കുന്നതിനു തൊട്ടുമുമ്പുള്ള 48 മണിക്കൂര്‍ വോട്ടറെ സംബന്ധിച്ചിടത്തോളം വളരെ പവിത്രമാണെന്ന് കമ്മിറ്റി അഭിപ്രായപ്പെടുന്നു. ആര്‍ക്കു വോട്ട് ചെയ്യണമെന്ന് സ്വതന്ത്രമായി ഇരുന്ന് ചിന്തിക്കേണ്ട സമയമാണത്. ഈ സമയത്ത് വോട്ടറെ സ്വാധീനിക്കുന്ന ഏതൊരു പ്രവൃത്തിയും നിയമവിരുദ്ധമാണ്.

തെറ്റായ വാര്‍ത്തകള്‍, ഊഹാപോഹങ്ങള്‍, സ്ഥാനാര്‍ഥിയെക്കുറിച്ചോ പാര്‍ട്ടിയെ കുറിച്ചോ ഉള്ള അപകീര്‍ത്തികരമായ വാര്‍ത്തകള്‍, തെറ്റിദ്ധാരണകള്‍, വിദ്വേഷ പ്രചാരണങ്ങള്‍ എന്നിവയിലൂടെ വോട്ടര്‍മാരെ സ്വാധീനിക്കാന്‍ സാമൂഹ്യമാധ്യമങ്ങള്‍ ഉപയോഗിക്കപ്പെടാന്‍ സാധ്യത ഏറെയാണെന്നും കമ്മിറ്റി ചൂണ്ടിക്കാട്ടി. കഴിഞ്ഞ ജനുവരിയിലാണ് ഇതമായി ബന്ധപ്പെട്ട ശുപാര്‍ശകള്‍ കമ്മിറ്റി തെരഞ്ഞെടുപ്പ് കമ്മീഷന്‍ മുമ്പാകെ സമര്‍പ്പിച്ചത്.

വിവിധ രാഷ്ട്രീയ പാര്‍ട്ടികള്‍ ഇത്തരമൊരു നിയന്ത്രണം ആവശ്യമാണെന്ന് അഭിപ്രായപ്പെട്ടതായും സമിതി ചൂണ്ടിക്കാട്ടി. നിയമ കമ്മീഷനും ഇക്കാര്യം വ്യക്തമാക്കിയിട്ടുണ്ട്.

2000ത്തിലെ ഇന്‍ഫര്‍മേഷന്‍ ടെക്‌നോളജി ആക്ടില്‍ പറയുന്ന മധ്യവര്‍ത്തികളെ കൂടി ഉള്‍പ്പെടുത്തി ജനപ്രാതിനിധ്യ നിയമത്തിന്റെ 126 വകുപ്പ് ഭേദഗതി ചെയ്യണമെന്നാണ് കമ്മിറ്റിയുടെ നിര്‍ദ്ദേശം. ഇതുമായി ബന്ധപ്പെട്ട തെരഞ്ഞെടുപ്പ് കമ്മീഷന്റെ തീരുമാനം ഉടനെ ഉണ്ടാവുമെന്നാണ് പ്രതീക്ഷ.