ദില്ലി: ഫെബ്രുവരി മാസം ഇന്ത്യന്‍ ഓഹരി വിപണി വിദേശ നിക്ഷേത്തില്‍ വന്‍ വളര്‍ച്ച രേഖപ്പെടുത്തിയതായി കണക്കുകള്‍. 17,220 കോടി രൂപയാണ് കഴിഞ്ഞ മാസം വിദേശത്തു നിന്നെത്തിയത്. 2017 നവംബറിന് ശേഷം ഇതാദ്യമായാണ് ഇത്രവലിയ തുക ഇന്ത്യന്‍ ഓഹരി വിപണിയിലേക്ക് വിദേശ നിക്ഷേപകരില്‍ നിന്ന് എത്തുന്നത്. ബജറ്റിനു ശേഷം കേന്ദ്ര സര്‍ക്കാര്‍ കൈക്കൊണ്ട അനുകൂല നടപടികളാണ് ഇത്തരമൊരു കുതിച്ചുചാട്ടത്തിന് കാരണമായതെന്നാണ് വിലയിരുത്തല്‍.

2017 നവംബറില്‍ 19,728 കോടി രൂപ വിദേശ നിക്ഷേപം ആകര്‍ഷിക്കാനായതാണ് ഇന്ത്യന്‍ ഓഹരി വിപണിയുടെ ഇതിനു മുമ്പത്തെ മികച്ച പ്രകടനം. ലഭ്യമായ കണക്കുകള്‍ പ്രകാരം ഫെബ്രുവരിയില്‍ 1,17,899 കോടിയിലേറെ രൂപ വിദേശ നിക്ഷേപകരില്‍ നിന്ന് രാജ്യത്തെ ഓഹരി വിപണിയിലെത്തിയപ്പോള്‍, 1,00,680 കോടി രൂപ വിപണിയില്‍ നിന്ന് പിന്‍വലിക്കപ്പെട്ടു.

കഴിഞ്ഞ ജനുവരിയില്‍ ഫോറിന്‍ പോര്‍ട്ട്‌ഫോളിയോ ഇന്‍വെസ്റ്റ്‌മെന്റില്‍ (എഫ്പിഐ) വലിയ കുറവ് രേഖപ്പെടുത്തിയിരുന്നു. ബജറ്റിനെ തുടര്‍ന്ന് നിലനിന്നിരുന്ന അനിശ്ചിതത്വമായിരുന്നു ഇതിന് കാരണം. റിപ്പോ നിരക്ക് 25 പോയിന്റ് കുറച്ച റിസര്‍വ് ബാങ്കിന്റെ നടപടി, സാമ്പത്തിക വളര്‍ച്ച ത്വരിതപ്പെടുത്തുമെന്ന സൂചന നല്‍കിയതും വിദേശ നിക്ഷേപകര്‍ ഇന്ത്യന്‍ ഓഹരി വിപണിയിലേക്ക് തിരികെയെത്താന്‍ കാരണമായതായി വിലയിരുത്തപ്പെടുന്നു.