അമേത്തി: ഇതുവരെ റഷ്യയില് നിര്മിച്ചിരുന്ന കലാഷ്നിക്കോവ് റൈഫിളുകള് ഇനി മുതല് ഉത്തര്പ്രദേശിലെ അമേത്തിയില് നിര്മിക്കും. കോണ്ഗ്രസ് അധ്യക്ഷന് രാഹുല് ഗാന്ധിയുടെ മണ്ഡലമായ അമേത്തിയിലെ കോര്വ ഓര്ഡന്സ് ഫാക്ടറിയിലാണ് എകെ 47 തോക്കുകളുടെ പരിഷ്ക്കരിച്ച പതിപ്പായ എകെ 203 റൈഫികളുകള് നിര്മിക്കുക. പദ്ധതിയുടെ ഉദ്ഘാടനം പ്രധാനമന്ത്രി നരേന്ദ്ര മോദി ഞായറാഴ്ച നിര്വഹിച്ചു. അമേത്തിയില് നിര്മിക്കുന്ന റൈഫികളുകള് ഭീകരര്ക്കും മാവോവാദികള്ക്കുമെതിരായ പോരാട്ടത്തില് സുരക്ഷാ സൈനികര്ക്ക് കരുത്ത് പകരുമെന്ന് പ്രധാനമന്ത്രി പറഞ്ഞു.
റഷ്യയും ഇന്ത്യയും സംയുക്തമായാണ് കലാഷ്നിക്കോവ് തോക്കുകള് നിര്മിക്കുക. ചുരുങ്ങിയ സമയത്തിനുള്ളില് ഇത്തരമൊരു സംരംഭത്തിന് അവസരമൊരുക്കിയത് റഷ്യന് പ്രസിഡന്റ് വ്ളാദ്മീര് പുടിനാണെന്നും അദ്ദേഹത്തിന് ഇക്കാര്യത്തില് നന്ദി പറയുന്നതായും പ്രധാനമന്ത്രി അറിയിച്ചു.
കലാഷ്നിക്കോവ് തോക്കുകള് ഇന്ത്യയില് നിര്മിക്കുന്നതുമായി ബന്ധപ്പെട്ട് റഷ്യന് സര്ക്കാരുമായി കേന്ദ്രഭരണകൂടം നേരത്തേ ധാരണയിലെത്തിയിരുന്നു. 7.62X39 എംഎം കാലിബറുള്ള 7.5 ലക്ഷം എകെ 203 തോക്കുകളാണ് അമേത്തിയിലെ ആയുധ നിര്മാണ ഫാക്ടറിയില് നിര്മിക്കുക.
ജെറ്റ് എയര്വെയ്സ് കൂടുതല് പ്രതിസന്ധിയിലേക്ക്; ഇതിനകം സര്വീസ് നിര്ത്തിയത് 23 വിമാനങ്ങള്
എകെ 203 നിര്മാണ പദ്ധതി കാര്യക്ഷമമായി നടപ്പിലാക്കുന്നതിന് സൈന്യത്തില് നിന്ന് ഒരു മേജര് ജനറലിന്റെ സേവനം ഫാക്ടറിയില് ലഭ്യമാക്കിയിട്ടുണ്ട്. പദ്ധതിക്ക് ആകെ 12,000 കോടി രൂപ ചെലവുവരുമെന്നാണ് പ്രാഥമിക വിലയിരുത്തല്. ഇന്ത്യയും റഷ്യയും പൊതുവായി അംഗീകരിക്കുന്ന മറ്റു രാജ്യങ്ങളിലേക്ക് ഇവിടെ നിര്മിക്കുന്ന തോക്കുകള് കയറ്റുമതി ചെയ്യാനുള്ള തീരുമാനവും ഇരുവിഭാഗവും അംഗീകരിച്ചിരുന്നു. പാകിസ്താന്, ചൈനീസ് അതിര്ത്തികളില് വിന്യസിച്ചിട്ടുള്ള സൈനികര്ക്ക് നല്കുന്നതിനാണ് പുതിയ കലാഷ്നിക്കോവ് റൈഫുകള് ഇന്ത്യ നിര്മിക്കുന്നത്. നിലവിലുള്ള ഇന്സാസ് റൈഫിളുകള്ക്ക് പകരമാണ് ഇവ നല്കുക.