ദില്ലി: കുറഞ്ഞ ടിക്കറ്റ് നിരക്കുമായി യാത്രക്കാരെ ആകര്‍ഷിക്കാന്‍ പരസ്പരം മല്‍സരിക്കുകയാണ് രാജ്യത്തെ വിമാനക്കമ്പനികള്‍. കുറഞ്ഞ ടിക്കറ്റ് നിരക്കുകള്‍ പ്രഖ്യാപിച്ച് ഗോ എയറും സ്‌പൈസ് ജെറ്റും രംഗത്തുവന്നതിനു പിന്നാലെ ഹോളി സെയിലുമായി എത്തിയിരിക്കുകയാണ് ഇന്‍ഡിഗോ.

നിശ്ചിത കാലയളവില്‍ വിമാന യാത്ര നടത്തുന്നവര്‍ക്കാണ് ഈ ആനുകൂല്യം ലഭിക്കുക. ആഭ്യന്തര സര്‍വീസിന് ഇന്‍ഡിഗോ ഈടാക്കുന്ന കുറഞ്ഞ നിരക്ക് 899 രൂപയാണ്. അന്താരാഷ്ട്ര സര്‍വീസിന് 3399 രൂപയും. ഈ വര്‍ഷം മാര്‍ച്ച് 19നും സപ്തംബര്‍ 28നുമിടയില്‍ യാത്ര ചെയ്യുന്നവര്‍ക്കാണ് നിരക്കിളവ് ലഭിക്കുക. പക്ഷെ മാര്‍ച്ച് ഏഴിനു മുമ്പ് ബുക്ക് ചെയ്തിരിക്കണമെന്ന് നിബന്ധനയുണ്ട്.

ബഗ്‌ദോഗ്രയില്‍ നിന്ന് ഗുവാഹത്തിയിലേക്കുള്ള ഫ്‌ളൈറ്റിനാണ് 899 രൂപ ടിക്കറ്റ്. ദില്ലി-അമൃതസര്‍ ടിക്കറ്റിന് 1899 രൂപയും ബംഗളൂരു-അഹമ്മദാബാദ് യാത്രയ്ക്ക് 1799 രൂപയും ദില്ലി-അഹമ്മദാബാദ് ഫ്‌ളൈറ്റിന് 2199 രൂപയുമാണ് ഓഫര്‍. ദില്ലി-കൊല്‍ക്കത്ത- 2899 രൂപ, ഡല്‍ഹി-മുംബൈ- 2399 രൂപ, ബംഗളൂരു-ദില്ലി- 2899 രൂപ എന്നിങ്ങനെയാണ് ഓഫര്‍ നിരക്ക്.

അന്താരാഷ്ട്ര സര്‍വീസുകളില്‍ ദില്ലിയില്‍ നിന്ന് കാഠ്മണ്ഡുവിലേക്ക് 3799 രൂപ, ദില്ലിയില്‍ ദുബൈയിലേക്ക് 6499 രൂപ, ദില്ലിയില്‍ നിന്ന് ക്വലാലംപൂരിലേക്ക് 7199 എന്നിങ്ങനെയാണ് ടിക്കറ്റ് നിരക്കുകള്‍. നോണ്‍ സ്‌റ്റോപ്പ് വിമാനങ്ങളില്‍ മാത്രമാണ് ഓഫര്‍ നിരക്ക് ബാധകം. ഗ്രൂപ്പ് ബുക്കിങ്ങുകള്‍ക്ക് ഓഫര്‍ ലഭിക്കില്ലെന്നും എയര്‍ലൈന്‍സ് വ്യക്തമാക്കി.

നേരത്തേ കുറഞ്ഞ ടിക്കറ്റ് നിരക്കുമായി ഗോ എയറും സ്‌പൈസ് ജെറ്റും രംഗത്തുവന്നിരുന്നു. ഗോ എയറിന്റെ ആഭ്യന്തര സര്‍വീസിന് ആഭ്യന്തര സര്‍വീസിന് 1,099 രൂപയും വിദേശ സര്‍വീസിന് 4,999 രൂപയുമായിരുന്നു ടിക്കറ്റ് നിരക്ക്. എതിരാളിയായ സ്‌പൈസ് ജെറ്റും കുറഞ്ഞ ടിക്കറ്റ് നിരക്കുകള്‍ പ്രഖ്യാപിച്ചിരുന്നു. ആഭ്യന്തര സര്‍വീസിന് 2,293 രൂപയാണ് സ്‌പൈസ് ജെറ്റ് നല്‍കുന്ന ഏറ്റവും കുറഞ്ഞ നിരക്ക്. ഗ്വാളിയോറില്‍ നിന്ന് വിവിധ നഗരങ്ങളിലേക്കും ഭോപ്പാല്‍-ഉദയ്പൂര്‍ റൂട്ടിലുമാണ് കുറഞ്ഞ ടിക്കറ്റ് നിരക്കുള്ളത്.