Click it and Unblock the Notifications
തിരുവനന്തപുരം: പ്രവാസി മലയാളികള് ഉള്പ്പെടെയുള്ളവരില് സംസ്ഥാനത്തേക്ക് നിക്ഷേപങ്ങള് ആകര്ഷിക്കുകയും അവര്ക്ക് സംരംഭങ്ങള് തുടങ്ങാന് സഹായം നല്കുകയും ചെയ്യുക എന്ന ലക്ഷ്യത്തോടെ നോര്ക്കയുടെ കീഴില് ആരംഭിക്കുന്ന ബിസിനസ് ഫെസിലിറ്റേഷന് കേന്ദ്രത്തിന് തുടക്കമായി. കേരളത്തിലെ വ്യവസായ സംരംഭക സാദ്ധ്യതകള് സംരംഭകര്ക്ക് മുമ്പില് അവതരിപ്പിച്ച് സംരംഭങ്ങള് തുടങ്ങാനുള്ള സാഹചര്യം ഒരുക്കുകയാണ് സെന്റര് കൊണ്ട് ഉദ്ദേശിക്കുന്നത്.
മുംബൈയിലെ ഇന്റ് അഡൈ്വസറി കൗണ്സിലിന്റെ സഹകരണത്തോടെയാണ് കേന്ദ്രം പ്രവര്ത്തിക്കുക. സംരംഭങ്ങള് തുടങ്ങുന്നതിനാവശ്യമായ സര്ക്കാര് ലൈസന്സുകള്, ക്ലിയറന്സ് ഉപദേശങ്ങള് തുടങ്ങിയവ കേന്ദ്രം നല്കും. കേരളത്തിലെ വ്യവസായ, സംരംഭക സാധ്യതകള് പഠിച്ച് മുന്ഗണനാക്രമത്തില് സംരംഭകര്ക്ക് മുന്നില് അവതരിപ്പിക്കുകയും സംരംഭങ്ങള് തുടങ്ങുന്നതിന് സാങ്കേതികവും സാമ്പത്തികവുമായ ഉപദേശങ്ങള് നല്കുകയും ചെയ്യും. പൊതുമേഖലാ ബാങ്കുകള്, സിഡ്കോ, കിന്ഫ്ര, കെ.എസ്.ഐ.ഡി.സി, കെ.എഫ്.സി തുടങ്ങിയ പൊതുമേഖല സ്ഥാപനങ്ങളുടെ നിക്ഷേപസംബന്ധമായ സേവനങ്ങള് സംയോജിപ്പിച്ച് പ്രവാസികളിലേയ്ക്ക് എത്തിക്കുന്നതിനുളള നടപടികളും എന്.ബി.എഫ്.സി മുഖേന സ്വീകരിക്കും.
അതോടൊപ്പം തിരികെയെത്തിയ പ്രവാസികള്ക്ക് സ്വയം തൊഴില് സംരംഭം ആരംഭിക്കുന്നതിന് നടപ്പാക്കുന്ന പ്രവാസി പുനരധിവാസ പദ്ധതി വിപുലപ്പെടുത്തുന്നതിന്റെ ഭാഗമായി ഫെഡറല് ബാങ്കുമായും കേരളാ ഫിനാന്ഷ്യല് കോര്പ്പറേഷനുമായി നോര്ക്ക റൂട്ട്സ് ധാരണാ പത്രം ഒപ്പുവെച്ചു. ഇതോടെ 10 ഓളം ധനകാര്യ സ്ഥാപനങ്ങളുടെ 4,000ല് പരം ശാഖകളിലൂടെ പുനരധിവാസ പദ്ധതിയുടെ വായ്പ സേവനം പ്രവാസികള്ക്ക് ലഭ്യമാകും. ഫെഡറല് ബാങ്കിന്റെ ഗള്ഫ് രാജ്യങ്ങളിലെ ശാഖകളിലൂടെയും കേരള ഫിനാന്ഷ്യല് കോര്പ്പറേഷനിലെ ശാഖകളിലൂടെയും പദ്ധതിയുടെ വിശദാംശങ്ങള് ലഭിക്കും.
Sign in with Google