പുതുതായി ഇന്ത്യന്‍ വിപണിയിലെത്തിയ ഷവോമിയുടെ റെഡ്മി നോട്ട് 7, റെഡ്മി നോട്ട് 7 പ്രോ സ്മാര്‍ട്ട്‌ഫോണുകള്‍ വാങ്ങുന്നവര്‍ക്ക് കിടിലന്‍ ഓഫറുകളുമായി മൊബൈല്‍ സേവനദാതാക്കളായ ജിയോയും എയര്‍ടെല്ലും. പുതിയ മൊബൈല്‍ മാര്‍ക്കറ്റ് കണ്ടെത്താന്‍ ചൈനീസ് കമ്പനിയും കൂടുതല്‍ വരിക്കാരെ ആകര്‍ഷിക്കാന്‍ മൊബൈല്‍ സേവനദാതാക്കളും കണ്ടെത്തിയ പുതിയ മാര്‍ഗങ്ങളിലൊന്നാണിത്.

മിതമായ നിരക്കില്‍ മികച്ച ഫീച്ചറുകളുമായെത്തുന്ന റെഡ്മി നോട്ട് 7 ഫോണുകള്‍ വാങ്ങുന്നവര്‍ക്ക് ഇരട്ടി ഡാറ്റയാണ് ജിയോ ഓഫര്‍ ചെയ്തിരിക്കുന്നത്. മൈജിയോ അക്കൗണ്ട് വഴി 198 രൂപയ്‌ക്കോ അതിനു മുകളിലോ റീചാര്‍ജ് ചെയ്യുന്നവര്‍ക്കാണ് ഈ ആനുകൂല്യം ലഭിക്കുക. ഓരോ റീചാര്‍ജ് പാക്കിലും ഓഫര്‍ ചെയ്യുന്നതിന്റെ നേരെ ഇരട്ടി ഡാറ്റയാണ് ഇതിലൂടെ ലഭിക്കുക. സൗജന്യ കോളുകള്‍, എസ്എംഎസ്സുകള്‍ തുടങ്ങിയ ആനുകൂല്യങ്ങള്‍ക്ക് പുറമെയാണ് ഈ ഡബിള്‍ ഡാറ്റ ഓഫര്‍.

299 രൂപയ്ക്കും അതിനു മുകളിലും റീചാര്‍ജ് ചെയ്യുന്നവര്‍ക്ക് 2400 രൂപയുടെ കാഷ്ബാക്ക് ഓഫറും റിലയന്‍സ് ജിയോ മുന്നോട്ടുവയ്ക്കുന്നുണ്ട്. ഓഫറുടെകളെ കുറിച്ചുള്ള വിശദവിവരങ്ങള്‍ മൈജിയോ ആപ്പില്‍ ലഭിക്കും. ഇതേമാതൃകയില്‍ റെഡ്മി നോട്ട് 7 ഫോണുകള്‍ സ്വന്തമാക്കുന്നവര്‍ക്ക് ഡബിള്‍ ഡാറ്റ ഓഫറുമായി എയര്‍ടെല്ലും രംഗത്തുണ്ട്. 249 രൂപയുടെയും 349 രൂപയുടെയും റീചാര്‍ജുകളിലാണ് ഇത് ലഭിക്കുക. അതായത് 249 രൂപയ്ക്ക് റീച്ചാര്‍ജ് ചെയ്താല്‍ ദിനേന രണ്ട് ജിബി ഡാറ്റയ്ക്കു പകരം നാലു ജിബിയും 349 രൂപയുടെ പ്ലാനില്‍ മൂന്ന് ജിബിക്കു പകരം ആറു ജിബിയും ഡാറ്റ ലഭിക്കും. ഇതിനു പുറമെ, എയര്‍ടെല്‍ ടിവി, വിങ്ക് മ്യൂസിക് തുടങ്ങിയ സേവനങ്ങളും സൗജന്യമായി ലഭിക്കും.

റെഡ്മി നോട്ട് 7ന് 9,999 രൂപയും റെഡ്മി നോട്ട് 7 പ്രോയ്ക്ക് 13,999 രൂപയുമാണ് വിലയിട്ടിരിക്കുന്നത്. ഏതാനും ദിവസങ്ങള്‍ക്കും ഇവ രണ്ടും ഇന്ത്യന്‍ വിപണി കീഴടക്കാനെത്തും.