ലോകത്ത് ഏറ്റവും കൂടുതൽ സ്വർണ ശേഖരമുള്ള കേന്ദ്ര ബാങ്കുകളുടെ കൂട്ടത്തിൽ റിസർവ് ബാങ്ക് ഓഫ് ഇന്ത്യയും. 2019 ജനുവരിയിൽ ആറര ടൺ സ്വർണം കൂടി വാങ്ങിയതോടെ ആർബിഐയുടെ കൈവശമുള്ള മൊത്തം സ്വർണ ശേഖരം 607 ടൺ ആയി. ഇതോടെ പത്താം സ്ഥാനത്തേയ്ക്കാണ് ഇന്ത്യ ഉയർന്നിരിക്കുന്നത്.

ലോകത്ത് ഏറ്റവും കൂടുതൽ സ്വർണശേഖരമുള്ളത് അമേരിക്കയിലാണ്. 8133 ടൺ സ്വർണമാണ് അമേരിക്കയുടെ കൈവശമുള്ളത്. അമേരിക്കയുടെ മൊത്തം സുരക്ഷിത നിക്ഷേപത്തിന്റെ 75 ശതമാനവും സ്വർണത്തിലാണ് നിക്ഷേപിച്ചിരിക്കുന്നത്.

നെതർലൻഡ് ആയിരുന്നു മുമ്പ് പത്താം സ്ഥാനത്തുണ്ടായിരുന്നത്. എന്നാൽ ഈ വർഷം ഇന്ത്യ നെതർലൻഡിനെ മറികടന്ന് പത്താം സ്ഥാനത്തെത്തി. വേൾഡ് ഗോൾഡ് കൗൺസിലിന്റെ ഏറ്റവും പുതിയ കണക്കുകൾ പ്രകാരം ലോകത്തെ കേന്ദ്ര ബാങ്കുകൾ സുരക്ഷിത നിക്ഷേപം എന്ന നിലയിൽ സൂക്ഷിച്ചിരിക്കുന്ന സ്വർണത്തിന്റെ 6.2 ശതമാനം റിസർവ് ബാങ്കിന്റെ കൈവശമാണ്.

അമേരിക്കയ്ക്ക് പിന്നിലുള്ളത് ജർമ്മനിയാണ്. 3370 ടൺ സ്വർണമാണ് ഇവർ സൂക്ഷിച്ചിരിക്കുന്നത്. ഐ.എം.എഫിന്റെ കൈവശം 2814 ടൺ, ഇറ്റലിയുടെ കൈവശം 2452 ടൺ, ഫ്രാൻസ് 2436 ടൺ, റഷ്യ 2119 ട‌ൺ എന്നിങ്ങനെയാണ് സൂക്ഷിച്ചിരിക്കുന്നത്. ചൈന, സ്വിറ്റ്‌സർലൻഡ്, ജപ്പാൻ എന്നീ രാജ്യങ്ങളും ഇന്ത്യയ്ക്ക് തൊട്ട് മുകളിലുണ്ട്.

malayalam.goodreturns.in