ദില്ലി: ഇന്ത്യയില്‍ പുതിയ ഫീച്ചറുകളുമായി ഗൂഗ്ള്‍ മാപ്പ്. റോഡിലെ അപകടങ്ങള്‍, സ്പീഡ് കാമറകള്‍ എന്നിവയെ കുറിച്ചുള്ള വിവരങ്ങള്‍ വാഹനമോടിക്കുന്നവര്‍ക്ക് ലഭ്യമാക്കുന്നതാണ് പുതിയ സേവനങ്ങള്‍. ഗൂഗ്ള്‍ മാപ്പ് ഉപയോക്താക്കളില്‍ ആരെങ്കിലും ആക്‌സിഡന്റുകള്‍ റിപ്പോര്‍ട്ട് ചെയ്യുകയും അത് ഉറപ്പുവരുത്തുകയും ചെയ്താലാണ് അപകടമുന്നറിയിപ്പ് മാപ്പില്‍ പ്രത്യക്ഷപ്പെടുക. മൊബൈല്‍ സ്പീഡ് കാമറയുടെ കാര്യവും ഇതുപോലെ തന്നെ. ആരെങ്കിലും റിപ്പോര്‍ട്ട് ചെയ്യുന്നതിനനുസരിച്ച് ഗൂഗ്ള്‍ മാപ്പ് അതേക്കുറിച്ച് മുന്നറിയിപ്പ് നല്‍കും.

ഇന്ത്യയില്‍ ഇതാദ്യമായാണ് ഗൂഗ്ള്‍ മാപ്പ് ഇത്തരം സൗകര്യങ്ങള്‍ ഉപഭോക്താക്കള്‍ക്കായി ഒരുക്കുന്നത്. നിലവില്‍ അമേരിക്ക, ബ്രിട്ടന്‍, ആസ്‌ത്രേലിയ, റഷ്യ, ബ്രസീല്‍, മെക്‌സിക്കോ, കാനഡ, ഇന്തോനീഷ്യ എന്നിവടങ്ങളില്‍ മാത്രമാണ് ഇത്തരം സേവനങ്ങള്‍ ഗൂള്‍ള്‍ മാപ്പ് നല്‍കുന്നത്.

സ്പീഡ് കാമറയെക്കുറിച്ചുള്ള മുന്നറിയിപ്പ് ആന്‍ഡ്രോയിഡ് ഫോണുകളില്‍ മാത്രമാണ് ഇപ്പോള്‍ ലഭിക്കുക. വൈകാതെ ഐഫോണുകളിലും അത് ലഭ്യമാവും. ഇതോടൊപ്പം ദില്ലിയിലെ ഓട്ടോ റിക്ഷ റൂട്ടുകളും അവയുടെ നിരക്കുകളും ഗൂഗ്ള്‍ മാപ്പില്‍ നല്‍കിയിട്ടുണ്ട്. കഴിഞ്ഞ ഡിസംബര്‍ മുതലാണ് ഗൂഗ്‌ളിന്റെ ഏറ്റവും വ്യാപകമായി ഉപയോഗിക്കപ്പെടുന്ന നാവിഗേഷന്‍ ആപ്പ് ഈ സൗകര്യം നല്‍കിത്തുടങ്ങിയത്. പുതിയ വിവരങ്ങള്‍ വഴി ഒരു സ്ഥലത്തേക്ക് റിക്ഷയില്‍ പോകാനാവുമോ എന്നും അംഗീകൃത ചാര്‍ജ് എത്രയാണെന്നും അറിയാം.

ട്രാഫിക് പോലിസ് നല്‍കിയ റേറ്റ് ചാര്‍ട്ട് അനുസരിച്ചാണ് ഇത് തയ്യാറാക്കിയിരിക്കുന്നത്. ഓട്ടോ റൂട്ടും ഫെയറും അറിയാനുള്ള സംവിധാനം നിലവില്‍ ദില്ലിയില്‍ മാത്രമേയുള്ളൂ. നേരത്തേ സമീപപ്രദേശങ്ങളിലെ ഷോപ്പുകള്‍, സ്ഥാപനങ്ങള്‍ എന്നിവയെ കുറിച്ചുള്ള വിവരങ്ങള്‍ ലഭ്യമാക്കുക വഴി ഓഗ്‌മെന്റഡ് റിയാലിറ്റിയുടെ സാധ്യത ഗൂഗ്ള്‍മാപ്പ് ഉപയോഗപ്പെടുത്തിയിരുന്നു. ഒരു ദിവസം ലോകത്തെ മൂന്നു കോടിയിലേറെ ആളുകള്‍ ഒരോ ദിവസവും ഗൂഗ്ള്‍ മാപ്പിന്റെ സേവനം ഉപയോഗപ്പെടുത്തുന്നുണ്ടെന്നാണ് കണക്ക്.