ഔദ്യോഗിക മേഖലയിലെ തൊഴിലവസരങ്ങൾ ജനുവരിയിൽ 17 മാസത്തെ ഏറ്റവും ഉയർന്ന നിരക്കായ 8.96 ലക്ഷത്തിൽ എത്തിയെന്ന് ഇപിഎഫ്ഒയുടെ കണക്കുകൾ വ്യക്തമാക്കുന്നു. 2017 സെപ്തംബർ മുതലുള്ള ഇപിഎഫ്ഒയുടെ പേ റോൾ ഡേറ്റയിലാണ് ഇക്കാര്യങ്ങൾ വ്യക്തമാക്കിയിരിക്കുന്നത്.

2017 സെപ്തംബർ മുതൽ 2019 ജനുവരി വരെ എംപ്ലോയീസ് പ്രൊവിഡൻറ് ഫണ്ട് ഓർഗനൈസേഷന്റെ സാമൂഹ്യ സുരക്ഷാ പദ്ധതികളിൽ 76.48 ലക്ഷം പുതിയ ഉപഭോക്താക്കളെയാണ് കൂട്ടിച്ചേർത്തിരിക്കുന്നത്. അതായത് കഴിഞ്ഞ 17 മാസക്കാലയളവിൽ ഏകദേശം 76 ലക്ഷത്തിലധികം പേ‍ർക്കാണ് ഔപചാരിക മേഖലയിൽ ജോലിയിൽ ലഭിച്ചത്.

2019 ജനുവരിയിലെ ഇപിഎഫ്ഒ ​​എൻറോൾമെന്റ് 8,96,516 ആണ്. 2017 സെപ്തംബറിനു ശേഷമുള്ള ഏറ്റവും ഉയർന്ന നിരക്കാണ് ഇത്. എന്നാൽ 2018 ഡിസംബറിൽ 7.03 ലക്ഷമായിരുന്നു എൻറോൾമെന്റ്. പ്രതീക്ഷിച്ചതിനേക്കാൾ എണ്ണത്തിൽ 1.8 ശതമാനം കുറവാണ് രേഖപ്പെടുത്തിയത്.

2018 മാർച്ചിൽ ഇപിഎഫ്ഒയിൽ നിന്ന് 29,023 പേർ പുറത്തു പോയിരുന്നു. സാമ്പത്തിക വർഷത്തിന്റെ അവസാനമായതിനാലാണ് ഈ കുറവുണ്ടായതെന്ന് സാമ്പത്തിക വിദ​ഗ്ധർ പറയുന്നു. 2019 ജനുവരിയിൽ 22നും 25നും വയസ്സിനിടയിൽ പ്രായമുള്ള 2.44 ലക്ഷം പേർക്കാണ് തൊഴിൽ ലഭിച്ചിരിക്കുന്നത്. 18നും 21നും ഇടയിൽ പ്രായമുള്ള 2.24 ലക്ഷം പേർക്കും ജോലി ലഭിച്ചിട്ടുണ്ട്.

malayalam.goodreturns.in