മുംബൈ: ജെറ്റ് എയര്‍വെയ്‌സിന്റെ സ്ഥാപക ചെയര്‍മാനായ നരേഷ് ഗോയലും ഭാര്യ അനിതാ ഗോയലും കമ്പനിയുടെ ബോര്‍ഡില്‍ നിന്നും രാജിവെച്ചതായി ഇക്കോണമിക്‌സ് ടൈംസ് റിപ്പോര്‍ട്ട് ചെയ്തു. പണം കടം കൊടുത്ത ബാങ്കുകളുടെ കണ്‍സോഷ്യത്തിന് ഇതോടെ കമ്പനിയുടെ ഭരണം ഏറ്റെടുക്കാന്‍ സാധിക്കും.

നേരത്തെ ഗോയലിനും ഭാര്യയ്ക്കും കമ്പനിയുടെ 50.01 ശതമാനം ഓഹരികളില്‍ നിയന്ത്രണം ഉണ്ടായിരുന്നു. 25 വര്‍ഷത്തിനിടെയുള്ള ഏറ്റവും ശക്തമായ സാമ്പത്തിക പ്രതിസന്ധിയിലൂടെയാണ് കമ്പനി കടന്നു പോകുന്നത്. സുഗമമായ പ്രവര്‍ത്തനം ഉറപ്പാക്കാന്‍ 1500 കോടിയോളം രൂപ എസ്ബിഐ ഉടന്‍ ഇറക്കുമെന്ന റിപ്പോര്‍ട്ടുകളുണ്ട്.

നരേഷ് ഗോയല്‍ ബോര്‍ഡ് അംഗത്വവും ചെയര്‍മാന്‍ സ്ഥാനവും രാജിവെച്ചുവെന്ന വാര്‍ത്ത പുറത്തുവന്നതോടെ ജെറ്റ് എയര്‍വെയ്‌സ് ഓഹരി വിലയില്‍ വന്‍ കുതിപ്പ് തന്നെയുണ്ടായി. 12.41 ശതമാനം വളര്‍ച്ചയോടെ 254.10 രൂപയിലാണ് ഓഹരി വില്‍പ്പന അവസാനിച്ചത്. 28.05 രൂപയുടെ നേട്ടമാണ് ഒറ്റ ദിവസം കൊണ്ടുണ്ടായത്.