വിമാനയാത്രക്കാർക്ക് മുന്നറിയിപ്പ്!! ശ്രദ്ധിക്കേണ്ട കാര്യങ്ങൾ ഇവയാണ്

സ്കൂൾ അവധി

യുഎഇയില്‍ അടുത്ത രണ്ടാഴ്ച്ച സ്കൂളുകൾക്ക് അവധിയാണ്. ഇന്ന് മുതലാണ് യുഎഇയിലെ സ്കൂളുകള്‍ക്ക് അവധി പ്രഖ്യാപിച്ചിരിക്കുന്നത്. മറ്റ് പൊതു അവധികളും അടുത്തു വരുന്നതോടെ വിമാന യാത്രക്കാരുടെ എണ്ണത്തില്‍ വലിയ വര്‍ദ്ധനവുണ്ടാകും.

കേരളത്തിൽ നിന്ന് ​ഗൾഫിലേയ്ക്ക്

അവധിക്കാലം ആരംഭിച്ചതോടെ കേരളത്തിൽ നിന്ന് ​ഗൾഫിലേയ്ക്കുള്ള യാത്രക്കാരുടെ എണ്ണത്തിലും വർദ്ധനവുണ്ട്. ഇതിനെ തുടർന്ന് വിമാന ടിക്കറ്റുകളുടെ നിരക്കും കമ്പനികൾ കുത്തനെ ഉയർത്തി. നിലവിലുള്ള ടിക്കറ്റ് നിരക്കിന്റെ നാലിരട്ടി വരെയാണ് കമ്പനികൾ കുത്തനെ കൂട്ടിയിരിക്കുന്നത്. എന്നാൽ ​ഗൾഫിൽ നിന്ന് കേരളത്തിലേയ്ക്കുള്ള ടിക്കറ്റ് നിരക്കുകൾക്ക് വ്യത്യാസമില്ല.

തിരക്ക് ഏപ്രിൽ രണ്ട് വരെ

അബുദാബി എയര്‍പോര്‍ട്ടില്‍ വ്യാഴാഴ്ച മുതൽ വൻ തിരക്കാണ് അനുഭവപ്പെട്ടു കൊണ്ടിരിക്കുന്നത്. ഏപ്രില്‍ രണ്ട് വരെ തിരക്ക് തുടരുമെന്നാണ് വിവിധ വിമാനക്കമ്പനികൾ അറിയിച്ചിരിക്കുന്നത്.

യാത്രക്കാർ ശ്രദ്ധിക്കേണ്ട കാര്യങ്ങൾ

യാത്രക്കാരുടെ തിരക്ക് മൂലമുള്ള അസൗകര്യങ്ങള്‍ ഒഴിവാക്കാന്‍ യാത്രക്കാർ ചില കാര്യങ്ങൾ പ്രത്യേകം ശ്രദ്ധിക്കണം.

• വിമാനം പുറപ്പെടുന്ന സമയത്തിന് മൂന്ന് മണിക്കൂര്‍ മുന്‍പെങ്കിലും വിമാനത്താവളത്തിലെത്തണം

• നേരത്തെ ചെക് ഇന്‍ ചെയ്യാനുള്ള സൗകര്യങ്ങൾ പ്രയോജനപ്പെടുത്തുക

• വിമാനത്താവളത്തിലേക്കുള്ള റോഡുകളില്‍ അറ്റകുറ്റപ്പണികള്‍ നടക്കുന്നതിനാല്‍ വിമാനത്താവളത്തിലേക്ക് വരുന്നവര്‍ നേരത്തെയിറങ്ങാന്‍ ശ്രദ്ധിക്കണം.