തിരുവനന്തപുരം: ഇന്‍ഡിഗോ എയര്‍ലൈന്‍സിന്റെ തിരുവനന്തപുരം-കൊച്ചി, തിരുവനന്തപുരം-കണ്ണൂര്‍ സര്‍വീസുകള്‍ ആരംഭിച്ചു. 74 പേര്‍ക്ക് യാത്രചെയ്യാവുന്ന എ.ടി.ആര്‍. വിമാനങ്ങളുപയോഗിച്ചാണ് ഇന്‍ഡിഗോ ഈ റൂട്ടുകളില്‍ സര്‍വീസ് നടത്തുന്നത്. ഞായറാഴ്ച രാവിലെ 9.40-ന് കൊച്ചിയില്‍ നിന്നും തിരുവനന്തപുരത്തെത്തിയ വിമാനത്തെ എയര്‍പോര്‍ട്ട് അതോറിറ്റി വാട്ടര്‍ സല്യൂട്ട് നല്‍കി സ്വീകരിച്ചു.

ഉച്ചയ്ക്ക് 2.25ന് കണ്ണൂര്‍ വിമാനത്താവളത്തില്‍ നിന്നുള്ള ആദ്യ ഇന്‍ഡിഗോ വിമാനവും തിരുവനന്തപുരത്തെത്തി. തിരുവനന്തപുരത്തു നിന്ന് കണ്ണൂരിലേക്കും കൊച്ചിയിലേക്കും തിരികെയും എല്ലാ ദിവസവും സര്‍വീസുണ്ടാകും. തിരുവനന്തപുരത്തു നിന്ന് 50 മിനിട്ടാണ് കൊച്ചിയിലെത്താനുള്ള സമയം.

തിരുവനന്തപുരത്ത് നിന്ന് കൊച്ചിയിലേക്ക് രാവിലെയുള്ള വിമാനം 10.10നും വൈകുന്നേരമുള്ള വിമാനം 7.40നുമാണ് പുറപ്പെടുക. കണ്ണൂരില്‍ നിന്നുള്ള വിമാനം ഉച്ചയ്ക്ക് 2.15-ന് തിരുവനന്തപുരത്തെത്തും. 2.45നാണ് ഇത് തിരികെ കണ്ണൂരിലേക്ക് പുറപ്പെടുക.