ദില്ലി: ഏതൊക്കെ ചാനലുകള്‍ വേണമെന്ന് തെരഞ്ഞെടുക്കാനുള്ള അധികാരം ഉപഭോക്താവിന് നല്‍കുകയും ചാനലുകള്‍ക്ക് ഈടാക്കാവുന്ന തുക നിജപ്പെടുത്തുകയും ചെയ്തുകൊണ്ടുള്ള പുതിയ താരിഫ് നയം നടപ്പിലാക്കാന്‍ ഡിടിഎച്ച്-കേബിള്‍ ടിവി ഓപ്പറേറ്റര്‍മാര്‍ക്ക് നല്‍കിയ സമയപരിധി അവസാനിച്ചു. മാര്‍ച്ച് 31 വരെയായിരുന്നു തങ്ങളുടെ വരിക്കാരെ പുതിയ താരിഫിലേക്ക് മാറ്റാന്‍ കമ്പനികള്‍ക്ക് ട്രായ് അനുവദിച്ച സമയം. എന്നാല്‍ ഇനിയും പുതിയ താരിഫിലേക്ക് മാറിയിട്ടില്ലാത്ത ചാനല്‍ വരിക്കാരുടെ കാര്യത്തില്‍ എന്തു സംഭവിക്കുമെന്നതിനെ കുറിച്ച് വ്യക്തത കൈവന്നിട്ടില്ല.

പുതിയ താരിഫിലേക്ക് മാറാന്‍ ബാക്കിയുള്ളവരും എന്നാല്‍ ഡിടിഎച്ച്-കേബിള്‍ ടിവി കമ്പനികള്‍ക്ക് ഏപ്രില്‍ മുതലുള്ള വരിസംഖ്യ നല്‍കിയവരുമായ ഉപഭോക്താക്കളെ ഏറ്റവും അനുയോജ്യമായ പ്ലാനിലേക്ക് (ബെസ്റ്റ് ഫിറ്റ് പ്ലാന്‍) മാറ്റുമെന്നാണ് ലഭിക്കുന്ന സൂചന. ട്രായ് തന്നെയാണ് ഈ പ്ലാന്‍ ഉപഭോക്താക്കള്‍ക്ക് തെരഞ്ഞെടുത്ത് നല്‍കുക.

ഏറ്റവും നല്ല പ്ലാന്‍ തെരഞ്ഞെടുക്കാന്‍ ഉപഭോക്താക്കളെ സഹായിക്കുന്നതിനായി മൊബൈല്‍ ആപ്ലിക്കേഷന്‍ ട്രായ് ഇറക്കിയിരുന്നു. തങ്ങള്‍ക്കിഷ്ടപ്പെട്ട ചാനലുകള്‍ തെരഞ്ഞെടുത്താല്‍ എത്ര ബില്ല് വരും എന്ന് കണക്കുകൂട്ടാന്‍ സഹായിക്കുന്നതാണ് മൊബൈല്‍ ആപ്പ്.

അന്യായമായി ഉപഭോക്താക്കളെ കൊള്ളയടിക്കുകയും തങ്ങള്‍ക്കു തോന്നുന്ന ചാനലുകള്‍ അവരുടെ മേല്‍ അടിച്ചേല്‍പ്പിക്കുകയും ചെയ്യുന്ന സേവനദാതാക്കളുടെ നയങ്ങള്‍ക്ക് തിരിച്ചടി നല്‍കി കഴിഞ്ഞ ഡിസബംര്‍ 29നായിരുന്നു ട്രായ് പുതിയ താരിഫ് നയം പ്രഖ്യാപിച്ചത്. എന്നാല്‍ നിലവിലെ രീതിയില്‍ നിന്ന് പുതിയ താരിഫിലേക്ക് ഉപഭോക്താക്കളെ മാറ്റാന്‍ കമ്പനികള്‍ക്ക് സമയം നല്‍കുന്നതിനു വേണ്ടി മാര്‍ച്ച് 31 വരെ പദ്ധതി നടപ്പിലാക്കുന്നത് നീട്ടുകയായിരുന്നു. നിലവില്‍ 10 കോടി ഡിടിഎച്ച് ഉപഭോക്താക്കളും 6.7 കോടി കേബ്ള്‍ ടിവി വരിക്കാരുമാണ് രാജ്യത്തുള്ളത്. ഇതില്‍ ഭൂരിപക്ഷം പേരും പുതിയ താരിഫിലേക്ക് മാറിക്കഴിഞ്ഞു.