വാഷിംഗ്ടണ്‍: 2019-20 സാമ്പത്തിക വര്‍ഷത്തില്‍ ഇന്ത്യ 7.5 സാമ്പത്തിക ശതമാനം വളര്‍ച്ച കൈവരിക്കുമെന്ന് പ്രതീക്ഷിക്കുന്നതായി ലോക ബാങ്ക് വിലയിരുത്തി. കഴിഞ്ഞ സാമ്പത്തിക വര്‍ഷത്തില്‍ 7.2 ശതമാനമായിരുന്നു ആഭ്യന്തര വളര്‍ച്ചാ നിരക്ക്. നിക്ഷേപത്തില്‍ തുടര്‍ച്ചയായി ഉണ്ടായിക്കൊണ്ടിരിക്കുന്ന വര്‍ധനവ്, മെച്ചപ്പെട്ട കയറ്റുമതി, ഉയര്‍ന്ന ഉപഭോഗം തുടങ്ങിയവയുടെ അടിസ്ഥാനത്തിലാണ് ആഭ്യന്തര വളര്‍ച്ചാ നിരക്കില്‍ (ജിഡിപി) രാജ്യം വളര്‍ച്ച കൈവരിക്കുമെന്ന് ലോക ബാങ്ക് വിലയിരുത്തുന്നത്.

സൗത്ത് ഏഷ്യന്‍ സാമ്പത്തിക രംഗത്തെക്കുറിച്ചുള്ള ലോകബാങ്കിന്റെ അന്തിമ റിപ്പോര്‍ട്ടിലാണ് ഈ വിലയിരുത്തല്‍. ലോക ബാങ്കിന്റെയും ഇന്റര്‍നാഷനല്‍ മോണിറ്ററി ഫണ്ടി (ഐഎംഎഫ്)ന്റെയും സുപ്രധാന യോഗത്തിനു മുമ്പാണ് റിപ്പോര്‍ട്ട് പ്രസിദ്ധീകരിച്ചത്.

രാജ്യത്തെ വ്യാവസായിക വളര്‍ച്ച 7.9 ശതമാനമാകുമെന്നും റിപ്പോര്‍ട്ടില്‍ പറയുന്നു. കാര്‍ഷിക മേഖലയിലും നല്ല വളര്‍ച്ച ഈ സാമ്പത്തിക വര്‍ഷം പ്രതീക്ഷിക്കുന്നുണ്ട്. ആഭ്യന്തര ഉപഭോഗത്തിലുള്ള വര്‍ധനവാണ് സാമ്പത്തിക വളര്‍ച്ചയുടെ പ്രധാന കാരണങ്ങളിലൊന്നായി റിപ്പോര്‍ട്ട് വിലയിരുത്തുന്നത്. പണപ്പെരുപ്പ നിരക്ക് പിടിച്ചുനിര്‍ത്താനായതും ഇന്ത്യയ്ക്ക് നേട്ടമായി. കയറ്റുമതിയിലുണ്ടായ വന്‍ പുരോഗതിയും എണ്ണ വിലയിലുണ്ടായ കുറവും ഇന്ത്യയ്ക്ക് നേട്ടമാകുമെന്നും റിപ്പോര്‍ട്ട് വിലയിരുത്തി.

കഴിഞ്ഞ സാമ്പത്തിക വര്‍ഷത്തില്‍ ആദ്യ മൂന്ന് മാസത്തെ കണക്കുകള്‍ പ്രകാരം വലിയ തോതിലുള്ള വളര്‍ച്ചാ നിരക്കായിരുന്നു രേഖപ്പെടുത്തിയിരുന്നത്. 2019-20 സാമ്പത്തിക വര്‍ഷത്തില്‍ 7.5 ശതമാനം വളര്‍ച്ച കൈവരിക്കുന്നതോടെ രാജ്യത്തെ ഭക്ഷ്യ വസ്തുക്കളുടെ വില ഏകീകരിക്കപ്പെടും. നാണയപ്പെരുപ്പം നാല് ശതമാനമാകുമെന്നും ലോക ബാങ്ക് വ്യക്തമാക്കി.