ദില്ലി: ശമ്പള കുടിശ്ശിക നല്‍കണമെന്നാവശ്യപ്പെട്ട് ജെറ്റ് എയര്‍വെയ്‌സ് ജീവനക്കാര്‍ പ്രതിഷേധം സംഘടിപ്പിച്ചു. ഇന്ദിരാഗാന്ധി അന്താരാഷ്ട്ര വിമാനത്താവളത്തിന്റെ ടെര്‍മിനല്‍-3നു പുറത്ത് ശനിയാഴ്ച ഉച്ചയ്ക്കു ശേഷമായിരുന്നു പ്രതിഷേധം. ജെറ്റ് എയര്‍വെയ്‌സിന്റെ യൂനിഫോമില്‍ ടെര്‍മിനലിന് പുറത്ത് സംഘടിച്ച ജീവനക്കാര്‍ മൗനമായാണ് പ്രതിഷേധം രേഖപ്പെടുത്തിയത്. ജെറ്റ് എയര്‍വെയ്‌സിനെ രക്ഷിക്കൂ; ഞങ്ങളുടെ ഭാവി രക്ഷിക്കൂ എന്ന് എഴുതിയ പ്ലക്കാര്‍ഡുകള്‍ പ്രതിഷേധക്കാര്‍ ഉയര്‍ത്തി. ഹിയര്‍ ഔവര്‍ ക്രൈ; ലെറ്റ് നൈന്‍ ഡബ്ല്യു ഫ്‌ളൈ (ഞങ്ങളുടെ രോദനം കോള്‍ക്കൂ; 9 ഡബ്ല്യു (ജെറ്റ് എയര്‍വെയ്‌സ് കോഡ്) പറക്കട്ടെ' എന്നും പ്രതിഷേധക്കാര്‍ എഴുതി.

വെള്ളിയാഴ്ച മുംബൈയില്‍ ജെറ്റ് എയര്‍വെയ്‌സ് ജീവനക്കാര്‍ പ്രതിഷേധ സൂചകമായി മൗനജാഥ നടത്തിയിരുന്നു. 119 വിമാനങ്ങള്‍ സര്‍വീസ് നടത്തിയിരുന്ന ജെറ്റ് എയര്‍വെയ്‌സിന് നിലവില്‍ ആറ് വിമാനങ്ങള്‍ മാത്രമാണുള്ളത്. സാമ്പത്തിക പ്രതിസന്ധി രൂക്ഷമായതിനെ തുടര്‍ന്ന് പൈലറ്റുമാര്‍ ഉള്‍പ്പെടെയുള്ളവരുടെ ശമ്പളം മാസങ്ങളായി മുടങ്ങിക്കിടക്കുകയായിരുന്നു. പൈലറ്റുമാര്‍ പണിമുടക്കുമെന്ന് നേരത്തേ ഭീഷണി മുഴക്കിയിരുന്നുവെങ്കില്‍ അവസാന നിമിഷം പിന്‍മാറുകയായിരുന്നു.

നിലവില്‍ കമ്പനിയുടെ കാര്യങ്ങള്‍ നിയന്ത്രിക്കുന്നത് എസ്ബിഐയുടെ നേതൃത്വത്തിലുള്ള കണ്‍സോര്‍ഷ്യമാണ്. ജീവനക്കാരുടെ ശമ്പള കുടിശ്ശിക ഭാഗികമായെങ്കിലും കൊടുത്തു തീര്‍ക്കുന്നതിന് താല്‍ക്കാലികമായി ഫണ്ട് കണ്ടെത്താനുള്ള ശ്രമത്തിലാണ് അധികൃതര്‍. അതിനിടെ, തിങ്കളാഴ്ച വരെയുള്ള അന്താരാഷ്ട്ര സര്‍വീസുകളും വടക്കുകിഴക്കന്‍ നഗരങ്ങളിലേക്കുള്ള വിമാനങ്ങളും ജെറ്റ് എയര്‍വെയ്‌സ് കാന്‍സല്‍ ചെയ്തിരിക്കുകയാണ്. ഇത് നേരത്തേ ടിക്കറ്റ് ബുക്ക് ചെയ്ത യാത്രക്കാരെ ഏറെ വലച്ചതായി റിപ്പോര്‍ട്ടുണ്ട്.