മുംബൈ: പുതിയ വിദേശ നഗരങ്ങളിലേക്ക് നേരിട്ടുള്ള ഏഴ് സര്‍വീസുമായി സ്‌പൈസ് ജെറ്റ്. മുംബൈയില്‍ നിന്ന് റിയാദ്, കൊളംബോ, ധാക്ക, ഹോങ്കോംഗ്, ബാങ്കോക്ക്, കാഡ്മണ്ഠു എന്നിവിടങ്ങളിലേക്കാണ് പുതിയ സര്‍വീസുകള്‍. മെയ് അവസാനത്തോടെ എല്ലാ സര്‍വീസുകളും ആരംഭിക്കുമെന്ന് ബജറ്റ് എയര്‍ലൈനായ സ്‌പൈസ് ജെറ്റ് അറിയിച്ചു. പുതിയ പ്രഖ്യാപനത്തോടെ ഓഹരിവിപണിയില്‍ കമ്പനി 8.6 ശതമാനം നേട്ടമുണ്ടാക്കി.

സുരക്ഷാപ്രശ്‌നത്തെ തുടര്‍ന്ന് 12 ബോയിംഗ് 737 മാക്‌സ് 8 വിമാനങ്ങള്‍ സര്‍വീസ് നിര്‍ത്തിയത് കമ്പനിയുടെ വിദേശ സര്‍വീസുകളെ കാര്യമായി ബാധിച്ചിരുന്നു. ബോയിംഗ് വിമാനം അപകടത്തില്‍ പെടുന്നത് പതിവായതിനെ തുടര്‍ന്ന് ആഗോള തലത്തില്‍ ഇവ പിന്‍വലിച്ചതിന്റെ ഭാഗമായിരുന്നു നടപടി.

ഇവയുടെ കുറവ് പരിഹരിക്കാന്‍ 16 ബോയിംഗ് 737-800 എന്‍ജി വിമാനങ്ങള്‍ ലീസിനെടുക്കുന്ന കാര്യം പരിഗണിച്ചുവരികയാണെന്ന് കമ്പനി അറിയിച്ചിരുന്നു. ഇതിനായി ഡയരക്ടറേറ്റ് ഓഫ് സിവില്‍ ഏവിയേഷന്റെ അനുമതി തേടിയിരിക്കുകയാണ് കമ്പനി.

പുതുതായി പ്രഖ്യാപിച്ച സര്‍വീസുകളില്‍ റിയാദ്, കാഠ്മണ്്ഠു എന്നിവിടങ്ങളിലേക്ക് ആദ്യമായാണ് സ്‌പൈസ് ജെറ്റ് സര്‍വീസ് നടത്തുന്നത്. കൊളംബോ, ധാക്ക, ഹോങ്കോംഗ്, ജിദ്ദ എന്നിവിടങ്ങളിലേക്ക് നിലവില്‍ സര്‍വീസുകളുണ്ട്. ഇവിടങ്ങളിലേക്ക് എല്ലാ ദിവസവും സര്‍വീസ് നടത്തുന്ന ഏക ബജറ്റ് എയര്‍ലൈന്‍ സ്‌പൈസ് ജെറ്റാണെന്ന് കമ്പനി പ്രസ്താവനയില്‍ അറിയിച്ചു.

ബോയിംഗ് 737ന്റെ 37 വിമാനങ്ങളും ബൊംബാര്‍ഡിയര്‍ ക്യു400ന്റെ 27 വിമാനങ്ങളും അടക്കം ആകെ 64 വിമാനങ്ങളാണ് സസ്‌പൈസ് ജെറ്റ് സര്‍വീസ് നടത്തുന്നത്. 60 കേന്ദ്രങ്ങളിലേക്കായി ശരാശരി 516 പ്രതിദിന സര്‍വീസുകള്‍ എയര്‍ലൈന്‍ നടത്തുന്നുണ്ട്. ഇവയില്‍ 51 ആഭ്യന്തര കേന്ദ്രങ്ങളും 9 അന്താരാഷ്ട്ര കേന്ദ്രങ്ങളുമാണ്.