ജെറ്റ് എയർവെയ്സിൽ ടിക്കറ്റ് ബുക്ക് ചെയ്തവർ ഇനി എന്ത് ചെയ്യണം?

പണം തിരികെ നൽകും

ടിക്കറ്റ് ബുക്ക് ചെയ്തവര്‍ക്ക് എത്രയും പെട്ടെന്ന് പണം തിരികെ നല്‍കുമെന്നാണ് ജെറ്റ് എയര്‍വേസിന്‍റെ വെബ്സൈറ്റ് വ്യക്തമാക്കുന്നത്. പരമാവധി 10 ദിവസമാണ് ഇതിനായി ജെറ്റ് എയര്‍വെയ്സ് കണക്കാക്കുന്ന സമയം.

ടിക്കറ്റ് ബുക്ക് ചെയ്തവർ ചെയ്യേണ്ടത് എന്ത്?

ടിക്കറ്റ് ബുക്ക് ചെയ്തവർ റീഫണ്ടിനായി വിമാനം പുറപ്പെടുന്നതിന് 72 മണിക്കൂർ മുമ്പ് എയർലൈന്റെ ഓഫീസിൽ വിളിക്കുകയോ നേരിട്ട് എത്തുകയോ ചെയ്യണം. ജെറ്റ് എയർവെയ്സ് വെബ്സൈറ്റ് വഴി നേരിട്ട് ടിക്കറ്റ് ബുക്ക് ചെയ്തവർ 72 മണിക്കൂർ മുമ്പ് ഒരു ഫോം പൂരിപ്പിക്കേണ്ടതുണ്ട്. ഏജന്റ് വഴി ടിക്കറ്റ് ബുക്ക് ചെയ്തവർ ഏജന്റുമായി ബന്ധപ്പെടണം. ആപ്പ് വഴി ടിക്കറ്റ് ബുക്ക് ചെയ്തവർ ടിക്കറ്റ് ക്യാൻസൽ ചെയ്യുകയും റീഫണ്ട് ഓപ്ഷൻ ക്ലിക്ക് ചെയ്യുകയും വേണം.

എയർ ഇന്ത്യ ഏറ്റെടുക്കും

ജെറ്റ് എയർവെയ്സിന്റെ അഞ്ച് വിമാനങ്ങള്‍ ഏറ്റെടുക്കാന്‍ തയ്യാറാണെന്ന് ദേശീയ എയര്‍ലൈന്‍സായ എയര്‍ ഇന്ത്യ അറിയിച്ചിട്ടുണ്ട്. ജെറ്റ് എയര്‍വെയ്‌സിന്റെ അഞ്ച് അന്താരാഷ്ട്ര സര്‍വീസുകളാണ് എയർ ഇന്ത്യ ഏറ്റെടുക്കുന്നത്. മുംബൈ- ലണ്ടന്‍, ഡല്‍ഹി-ലണ്ടന്‍, മുംബൈ- ദുബായ്, ഡല്‍ഹി-ദുബായ്, ഡല്‍ഹി-സിംഗപ്പൂര്‍ എന്നീ റൂട്ടുകളാണ് എയർ ഇന്ത്യ ഏറ്റെടുക്കാൻ തയ്യാറായിരിക്കുന്നത്. ലീസ് വ്യവസ്ഥയിലാണ് സർവ്വീസ് ഏറ്റെടുക്കുന്നത്.

ടിക്കറ്റ് നിരക്ക്

ജെറ്റ് എയർവെയ്സ് സർവ്വീസുകൾ പൂർണമായും അവസാനിപ്പിച്ചതോടെ ഇത് മുതലെടുത്ത് മറ്റ് കമ്പനികള്‍ ടിക്കറ്റ് നിരക്ക് കുത്തനെ കൂട്ടി. ആഭ്യന്തര, അന്താരാഷ്ട്ര വിമാന നിരക്കുകളിൽ വൻ വർദ്ധനവാണ് രേഖപ്പെടുത്തിയിരിക്കുന്നത്. ജെറ്റ് നിലം തൊട്ടതോടെ വിമാനങ്ങളുടെ എണ്ണം വര്‍ദ്ധിപ്പിച്ച് അവസരം മുതലെടുക്കാൻ ശ്രമിക്കുന്ന വിമാനക്കമ്പനികളുമുണ്ട്.

കണക്ഷൻ ഫ്ലൈറ്റ്

ജെറ്റ് എയര്‍വേസിന്‍റെ പങ്കാളിയായ ഇത്തിഹാദില്‍ ടിക്കറ്റ് ബുക്ക് ചെയ്ത പലരുടെയും കണക്ഷന്‍ ഫ്ലൈറ്റ് ജെറ്റിന്‍റേതാണ്. ഇത്തരത്തില്‍ ടിക്കറ്റ് ബുക്ക് ചെയ്തവരാണ് നിലവിൽ വലിയ പ്രതിസന്ധിയിലായിരിക്കുന്നത്.