ദില്ലി: കടുത്ത സാമ്പത്തിക പ്രതിസന്ധി കാരണം സര്‍വീസ് നിര്‍ത്തിയ ജെറ്റ് എയര്‍വെയ്‌സിന്റെ അമ്പതോളം വിമാനങ്ങള്‍ അടുത്തയാഴ്ചയോടെ വീണ്ടും സര്‍വീസ് തുടങ്ങും. സ്‌പൈസ് ജെറ്റും എയര്‍ ഇന്ത്യയുമാണ് ഇവ വാടകയ്‌ക്കെടുത്ത് സര്‍വീസ് നടത്തുന്നത്. ജെറ്റ് എയര്‍വെയ്‌സിന്റെ നാല്‍പതോളം ബോയിംഗ് 737 വിമാനങ്ങളാണ് സ്‌പൈസ് ജെറ്റ് സ്വന്തമാക്കുന്നത്. അഞ്ച് വലിയ ബോയിംഗ് 777 വിമാനങ്ങള്‍ എയര്‍ ഇന്ത്യയും ഏറ്റെടുക്കും. എയര്‍ ഇന്ത്യ എക്‌സ്പ്രസിനായി ഏതാനും ബി737 വിമാനങ്ങളും സര്‍വീസ് നടത്തുന്നുണ്ട്.

ചൊവ്വാഴ്ചയോടെ ഇവയില്‍ ചിലത് സര്‍വീസുകള്‍ തുടങ്ങും. അടുത്ത 10 ദിവസത്തിനകം ഇവയെല്ലാം പറക്കല്‍ ആരംഭിക്കുമെന്ന കണക്കുകൂട്ടലിലാണ് ഈ രംഗത്ത് പ്രവര്‍ത്തിക്കുന്നവര്‍ വിലയിരുത്തുന്നത്.

ഇതോടെ വിമാന ടിക്കറ്റ് നിരക്ക് നിയന്ത്രണ വിധേയമാവുമെന്നാണ് കണക്കാക്കപ്പെടുന്നത്. അതോടൊപ്പം പല ജെറ്റ് എയര്‍വെയ്‌സ് ജീവനക്കാര്‍ക്കും ഇതോടെ ജോലിയില്‍ തുടരാനുമാവും. പൈലറ്റും മറ്റും ജീവനക്കാരും ഉള്‍പ്പെടെയാണ് സ്‌പൈസ് ജെറ്റും എയര്‍ ഇന്ത്യയും ജെറ്റ് വിമാനങ്ങള്‍ വാടകയ്‌ക്കെടുക്കുന്നത്. സ്‌പൈസ് ജെറ്റ് ആഭ്യന്തര സര്‍വീസുകളും എയര്‍ ഇന്ത്യ വിദേശ സര്‍വീസുകളുമാണ് ഈ വിമാനങ്ങള്‍ ഉപയോഗിച്ച് നടത്തുക. ലണ്ടന്‍, ദുബൈ, സിംഗപ്പൂര്‍ തുടങ്ങിയ സ്ഥലങ്ങളിലേക്കാണ് എയര്‍ ഇന്ത്യയുടെ സര്‍വീസുകള്‍.

ജെറ്റ് എയര്‍വെയ്‌സ് പ്രതിസന്ധിയിലായതോടെ കഴിഞ്ഞ അഞ്ചു മാസങ്ങള്‍ക്കിടയില്‍ 75 ആഭ്യന്തര സര്‍വീസുകള്‍ നിലച്ചതായി ഏവിയേഷന്‍ സെക്രട്ടറി പി എസ് ഖരോള കഴിഞ്ഞ ദിവസം പറഞ്ഞിരുന്നു. എന്നാല്‍ മറ്റ് കമ്പനികളുടെ 58 വിമാനങ്ങള്‍ ഇക്കാലയളവില്‍ പുതുതായി സര്‍വീസ് തുടങ്ങുകയും ചെയ്തു. മെയ്, ജൂണ്‍, ജൂലൈ മാസങ്ങളിലായി 30ലേറെ പുതിയ വിമാനങ്ങള്‍ കൂടി സര്‍വീസ് നടത്തുന്നതോടെ വ്യോമഗതാഗത രംഗത്തുണ്ടായ പ്രതിസന്ധി താല്‍ക്കാലികമായി പരിഹരിക്കപ്പെടുമെന്നും അദ്ദേഹം അഭിപ്രായപ്പെട്ടു. സ്‌പൈസ് ജെറ്റ് വിമാനങ്ങള്‍ സര്‍വീസ് നിര്‍ത്തിയത് കാരണം മുംബൈ എയര്‍പോര്‍ട്ടില്‍ നിന്നുള്ള 280 സര്‍വീസുകളും ഡല്‍ഹി എയര്‍പോര്‍ട്ടില്‍ നിന്നുള്ള 160 സര്‍വീസുകളും നിലച്ചിരുന്നു.