മനീഷ് മഹേശ്വരിയെ ട്വിറ്റർ ഇന്ത്യയുടെ എംഡിയായി നിയമിച്ചു. ഇന്നലെയാണ് മനീഷ് മഹേശ്വരിയെ മാനേജറായി നിയമിച്ച കാര്യം ട്വിറ്റർ വ്യക്തമാക്കിയത്. ഡൽഹി, മുംബൈ, ബംഗളൂരു എന്നിവിടങ്ങളിലുള്ള ട്വിറ്റർ ഇന്ത്യ ടീമിനെ നയിക്കുന്നത് ഇനി ഇദ്ദേഹമായിരിക്കും.
ട്വിറ്ററിന്റെ പ്രധാന മാർക്കറ്റുകളിലൊന്നായ ഇന്ത്യയിൽ ഉപയോക്താക്കൾക്ക് അനുസരിച്ചുള്ള വരുമാനം ഉയർത്തുകയാണ് മനീഷിന്റെ ചുമതലയെന്ന് ട്വിറ്റർ വൈസ് പ്രസിഡന്റ് മായാ ഹരി അറിയിച്ചു. നെറ്റ്വർക്ക് 18 ഡിജിറ്റലിന്റെ സിഇഒ ആയിരിക്കെയാണ് മനീഷ് ട്വിറ്ററിലേക്കെത്തുന്നത്.
ഈ മാസം 29ന് അദ്ദേഹം ട്വിറ്റർ ഇന്ത്യയിലെ ചുമതലയേൽക്കും. ഇന്ത്യയിൽ വളരെ വേഗത്തിൽ വളരുന്ന ഓൺലൈൻ ആശയവിനിമയ പ്ലാറ്റ്ഫോമാണ് ട്വിറ്ററെന്നും ട്വിറ്ററിന്റെ ഇന്ത്യയിലെ വ്യവസായത്തെ അടുത്ത ഘട്ടത്തിലേക്ക് ഉയർത്താൻ മനീഷ് കമ്പനിയ്ക്കൊപ്പം ചേർന്നതിൽ സന്തോഷമുണ്ടെന്നും മായാ ഹരി വ്യക്തമാക്കി.
ഡിജിറ്റൽ ബിസിനസ് വർദ്ധിപ്പിക്കുന്നതിന് ഇന്ത്യയിലെ മുൻനിര ടീമുകൾക്കൊപ്പം പ്രവർത്തിച്ചിട്ടുള്ള വ്യക്തിയാണ് മനീഷ് മഹേശ്വരി. മാധ്യമ, ടെക്നോളജി മേഖലകളിലെ ഇദ്ദേഹത്തിന്റെ 20 വർഷക്കാലത്തെ പരിചയ സമ്പത്ത് ട്വിറ്ററിന് ഗുണം ചെയ്യുമെന്നാണ് പ്രതീക്ഷ. മനീഷ് മഹേശ്വരിയുടെ നേതൃത്വത്തിൽ ഇന്ത്യയിൽ കൂടുതൽ നിക്ഷേപം നടത്താനും സാധ്യതയുണ്ട്.
ചിത്രത്തിന് കടപ്പാട് ഔദ്യോഗിക ട്വിറ്റർ പേജ്
malayalam.goodreturns.in