ദീര്‍ഘദൂര യാത്രക്കാര്‍ക്ക് അനുഗ്രഹമാവും

എഞ്ചിനില്ലാത്ത വന്ദേഭാരത് എക്‌സ്പ്രസിന്റെ വിജയത്തിന് പിന്നാലെ ദീര്‍ഘദൂര യാത്രയ്ക്കുള്ള ഇതിന്റെ സ്ലീപ്പര്‍ വേര്‍ഷന്‍ കൊണ്ടുവരാനുള്ള തയ്യാറെടുപ്പിലാണ് ഇന്ത്യന്‍ റെയില്‍വേ. 2020ഓടോ അത്യാധുനിക രീതിയിലുള്ള പുതിയ രാജധാനി എക്‌സ്പ്രസ് ഓടിത്തുടങ്ങുമെന്നാണ് പ്രതീക്ഷ.

നിര്‍മാണം ഐസിഎഫില്‍ നിന്ന്

വന്ദേഭാരത് നിര്‍മിച്ച ചെന്നൈയിലെ ഇന്റഗ്രല്‍ കോച്ച് ഫാക്ടറിയില്‍ നിന്നാണ് രാജധാനി എക്‌സ്പ്രസിന്റെ എഞ്ചിനില്ലാത്ത സ്ലീപ്പര്‍ കോച്ചുകളും നിര്‍മിക്കുന്നത്. അതിന്റെ ഡിസൈന്‍ പ്രവൃത്തികള്‍ പുരോഗമിക്കുന്നതായും അടുത്ത വര്‍ഷത്തോടെ നിര്‍മാണം പൂര്‍ത്തിയാക്കാനാകുമെന്നാണ് പ്രതീക്ഷയെന്നും ഇന്റഗ്രല്‍ കോച്ച് ഫാക്ടറിയിലെ ഉദ്യോഗസ്ഥര്‍ അറിയിച്ചു.

മണിക്കൂറില്‍ 160 കിലോമീറ്റര്‍ വേഗത

ഒന്നിലേറെ ദിവസം നീണ്ടു നില്‍ക്കുന്ന രാജധാനി എക്‌സ്പ്രസിന്റെ എഞ്ചിനില്ലാത്ത ട്രെയിനുകളുടെ വേഗത മണിക്കൂറില്‍ 160 കിലോമീറ്ററായിരിക്കും. രാജധാനി എക്‌സ്പ്രസ് നിലവില്‍ എടുക്കുന്ന സമയത്തിന്റെ പകുതിയ സമയം കൊണ്ട് ലക്ഷ്യസ്ഥാനങ്ങളിലെത്താന്‍ പുതിയ ട്രെയിനുകള്‍ വരുന്നതോടെ സാധിക്കുമെന്നാണ് വിലയിരുത്തപ്പെടുന്നത്.

നിര്‍മാണം വന്ദേഭാരത് മാതൃകയില്‍

നിലവില്‍ ശതാബ്ദി എക്‌സ്പ്രസുകള്‍ക്ക് പകരമാണ് വന്ദേഭാരത് എന്ന പേരിലറിയപ്പെടുന്നത് ട്രെയിന്‍ 18 ഇന്ത്യന്‍ റെയില്‍വേ അവതരിപ്പിച്ചത്. ആധുനിക സൗകര്യങ്ങളോടു കൂടിയുള്ള ഈ ട്രെയിനുകള്‍ കൂടുതല്‍ പ്രകൃതി സൗഹൃദങ്ങളാണെന്ന സവിശേഷതയുമുണ്ട്. ഡല്‍ഹി-വാരാണസി റൂട്ടിലോടുന്ന വന്ദേഭാരത് എക്‌സ്പ്രസില്‍ എക്‌സിക്യൂട്ടീവ്, നോണ്‍ എക്‌സിക്യൂട്ടീവ് കോച്ചുകള്‍ ഉള്‍പ്പെടെ 16 എസി ചെയര്‍കാറുകളാണുള്ളത്.

കൂടുതല്‍ സൗകര്യങ്ങള്‍

ഓട്ടോമാറ്റിക് ഡോറുകള്‍, സ്വയം പുറത്തേക്കും അകത്തേക്കും പോകുന്ന ചവിട്ടുപടികള്‍, ബുള്ളറ്റ് ട്രെയിന്‍ മാതൃകയിലുള്ള ബാഹ്യ രൂപം, യൂറോപ്യന്‍ മാതൃകയിലുള്ള സീറ്റുകള്‍, വിമാനത്തിലേത് പോലുള്ള എല്‍ഇഡി ലൈറ്റിംഗ് തുടങ്ങിയ സൗകര്യങ്ങള്‍ പുതിയ രാജധാനി എക്‌സ്പ്രസിലും ഉണ്ടാവുമെന്നാണ് കണക്കാക്കപ്പെടുന്നത്.