ദോഹയിലെ പ്രവാസികളെ ബുദ്ധിമുട്ടിലാക്കി ദോഹയില്‍ നിന്നും തിരുവനന്തപുരത്തേക്കുള്ള ഇൻഡി​ഗോ സര്‍വീസ് അവസാനിപ്പിക്കുന്നു. മേയ് ഒന്നു മുതല്‍ സര്‍വീസ് ഉണ്ടാകില്ലെന്നാണ് കമ്പനി ഔദ്യോഗികമായി അറിയിച്ചിരിക്കുന്നത്. ഇത് പ്രവാസികളെ കൂടുതൽ പ്രതിസന്ധിയിലാക്കും. വാണിജ്യപരമായ ശേഷി കണക്കിലെടുത്താണ് താത്ക്കാലിക സർവ്വീസ് റദ്ദാക്കൽ. ‌

താത്ക്കാലികമായാണ് സർവ്വീസ് അവസാനിപ്പിക്കുന്നത്. ഓഗസ്റ്റ് വരെ മൂന്ന് മാസത്തേക്ക് മാത്രമാണ് സർവ്വീസ് അവസാനിപ്പിക്കുന്നതെന്ന് കമ്പനി വ്യക്തമാക്കിയിട്ടുണ്ട്. ഓ​ഗസ്റ്റ് ഒന്ന് മുതൽ സർവ്വീസ് പുന:സ്ഥാപിക്കും. ടിക്കറ്റ് നിരക്ക് കുറവായതിനാല്‍ പ്രവാസികള്‍ ഏറെ ആശ്രയിക്കുന്നത് വിമാന സർവ്വീസാണ് ഇൻഡി​ഗോയുടേത്.

നിലവില്‍ ദോഹയില്‍ നിന്ന് തിരുവനന്തപുരം, കൊച്ചി, കോഴിക്കോട് എന്നിവിടങ്ങളിലേക്ക് സര്‍വീസുകളുണ്ട്. ഇതില്‍ തിരുവനന്തപുരത്തേക്കുള്ള സര്‍വീസ് മാത്രമാണ് അവസാനിപ്പിക്കുന്നത്.

സാമ്പത്തിക പ്രതിസന്ധിയിലായ ജെറ്റ് എയര്‍വേയ്സ് സര്‍വീസുകള്‍ അവസാനിപ്പിച്ചതിന് പിന്നാലെയാണ് ഇൻഡി​ഗോയും സര്‍വീസുകൾ നിര്‍ത്തുന്നത്. നേരത്തെ ടിക്കറ്റ് ബുക്ക് ചെയ്തവര്‍ക്ക് മറ്റ് റൂട്ടുകളിലേക്ക് ടിക്കറ്റ് മാറ്റുകയോ അല്ലെങ്കില്‍ മുഴുവന്‍ തുകയും തിരികെ വാങ്ങുകയോ ചെയ്യാമെന്ന് കമ്പനി അറിയിച്ചിട്ടുണ്ട്. നേരത്തെ ടിക്കറ്റ് ബുക്ക് ചെയ്തവര്‍ക്ക് ഇത് വ്യക്തമാക്കുന്ന എസ്എംഎസ് സന്ദേശം കമ്പനി അയച്ചു കഴിഞ്ഞു. എസ്എംഎസ് വഴി ലഭിക്കുന്ന ലിങ്കില്‍ പ്രവേശിച്ച് ഇത് ക്രമീകരിക്കാം.

 malayalam.goodreturns.in