തിരുവനന്തപുരം: കൂടുതല്‍ പോഷക ഗുണങ്ങളടങ്ങയുടെ മില്‍മയുടെ ഫോര്‍ട്ടിഫൈഡ് പാല്‍ മെയ് ഒന്ന് മുതല്‍ വിപണിയില്‍. വിറ്റാമിന്‍ എയും ഡിയുംചേര്‍ന്ന പാലാണ് പുതിയ പായ്ക്കിംഗില്‍ വിപണിയിലെത്തുന്നത്. ആദ്യഘട്ടത്തില്‍ തിരുവനന്തപുരത്തും, കോഴിക്കോടുമാണ് ഫോര്‍ട്ടിഫൈഡ് മില്‍മ പാല്‍ ലഭ്യമാകുക. ജൂലൈ ഒന്ന് മുതല്‍ മറ്റ് ജില്ലകളിലും ലഭ്യമാകും.

വിപണിയിലുള്ള കൊഴുപ്പ് കൂടിയ നീല കവര്‍ പാലിന് പകരമാണ് പുതിയ ഫോര്‍ട്ടിഫൈഡ് പാല്‍ വരുന്നത്. നിലവില്‍ പാലിന് ഈടാക്കുന്ന 21 രൂപ തന്നെയാണ് ഫോര്‍ട്ടിഫൈഡ് പാലിനും ഈടാക്കുകയെന്ന് മില്‍മ ചെയര്‍മാന്‍ അറിയിച്ചു. കൊഴുപ്പ് കുറഞ്ഞ മഞ്ഞ കവര്‍ പാലും ഫോര്‍ട്ടിഫൈഡ് രൂപത്തില്‍ രണ്ടുമാസത്തിനകം വിപണിയിലെത്തും.

ഒരു ഗ്ലാസ് ഫോര്‍ട്ടിഫൈഡ് പാല്‍ കുടിക്കുമ്പോള്‍ ഒരു ദിവസം ആവശ്യമുള്ള വിറ്റാമിന്‍ എയുടെ 47 ശതമാനവും വിറ്റാമിന്‍ ഡിയുടെ 34 ശതമാനവും ലഭിക്കുമെന്നാണ് മില്‍മയുടെ അവകാശവാദം. വിറ്റാമിന്‍ എയുടെ കുറവ് കുട്ടികളില്‍ കാഴ്ച വൈകല്യത്തിനും വിറ്റാമിന്‍ ഡിയുടെ കുറവ് പിള്ളവാതത്തിനും ഇടയാക്കുന്നുണ്ടെന്ന കണ്ടെത്തലിന്റെ അടിസ്ഥാനത്തിലാണ് പോഷക സമൃദ്ധമായ ഫോര്‍ട്ടിഫൈഡ് പാലുമായി മില്‍മ രംഗത്തെത്തിയിരിക്കുന്നത്. ദേശീയ ക്ഷീര വികസന ബോര്‍ഡ്, ദി ഇന്ത്യന്‍ ന്യൂട്രീഷ്യന്‍ ഇനീഷ്യേറ്റീവ് തുടങ്ങിയ സ്ഥാപനങ്ങളുടെ സഹകരണത്തോടെയാണ് മില്‍മ പുതിയ പദ്ധതി കേരളത്തില്‍ നടപ്പിലാക്കുന്നത്.