തെഹ്‌റാന്‍: എണ്ണയെ രാഷ്ട്രീയ ആയുധമായി ഉപയോഗിക്കുന്ന അമേരിക്കന്‍ നിലപാട് എണ്ണ ഉല്‍പ്പാദക രാജ്യങ്ങളുടെ കൂട്ടായ്മയായ ഒപെക്കിനെ തകര്‍ക്കുമെന്ന് ഇറാന്‍. ഒപെക് അംഗങ്ങളായ ഇറാനില്‍ നിന്നും വെനിസ്വേലയില്‍ നിന്നും എണ്ണ വാങ്ങുന്നതിന് വിലക്കേര്‍പ്പെടുത്തിയ അമേരിക്കന്‍ നടപടിയുടെ പശ്ചാത്തലത്തിലാണ് ഇറാന്‍ എണ്ണ മന്ത്രി ബൈജാന്‍ സന്‍ഗാനെയുടെ പരാമര്‍ശം.

അമേരിക്കയുടെ രാഷ്ട്രീയ പ്രേരിതമായ ഈ നടപടി ഒപെക്കിന്റെ നിലനില്‍പ്പിനെ തന്നെ ദോഷകരമായി ബാധിക്കുമെന്നും അദ്ദേഹം പറഞ്ഞു. തെഹ്‌റാനില്‍ നടന്ന ഊര്‍ജ സമ്മേളനത്തില്‍ സംസാരിക്കുകയായിരുന്നു മന്ത്രി. ഇറാനില്‍ നിന്ന് ഏറ്റവും കൂടുതല്‍ എണ്ണ ഇറക്കുമതി ചെയ്തിരുന്ന എട്ട് രാജ്യങ്ങള്‍ക്ക് ഉപരോധത്തില്‍ നല്‍കിയ ഇളവ് മെയ് ഒന്നിന് അവസാനിച്ചിരുന്നു. ആഗോള വിപണിയില്‍ എണ്ണയുടെ വില കുതിച്ചുയരാന്‍ ഇറാനും വെനിസ്വേലയ്ക്കുമെതിരായ ഉപരോധം കാരണമായിരിക്കുകയാണെന്നും അദ്ദേഹം പറഞ്ഞു.

ഇറാന്റെ എണ്ണ വിതരണം നിലയ്ക്കുന്നതു മൂലം ഉണ്ടാവുന്ന എണ്ണക്ഷാമം പരിഹരിക്കാന്‍ സൗദി അറേബ്യ ഉള്‍പ്പെടെയുള്ള രാജ്യങ്ങള്‍ക്ക് അമേരിക്കന്‍ പ്രസിഡന്റ് നിര്‍ദ്ദേശം നല്‍കിയിരിക്കുകയാണ്. എന്നാല്‍ ഇത് നടക്കാന്‍ പോവുന്നില്ലെന്നാണ് ഇറാന്‍ മന്ത്രിയുടെ വാദം. തങ്ങളുടെ അയല്‍ രാജ്യങ്ങള്‍ അവകാശപ്പെടുന്നതു പോലെ ഉല്‍പ്പാദനം വര്‍ധിപ്പിക്കാന്‍ സാധ്യമല്ലെന്നും വരുംനാളുകളില്‍ പ്രതിസന്ധി രൂക്ഷമാവുമെന്നും ഇറാന്‍ മന്ത്രി പറഞ്ഞു.

അമേരിക്കന്‍ ഉപരോധത്തിന്റെ പശ്ചാത്തലത്തില്‍ എണ്ണ കയറ്റുമതിക്ക് മറ്റു മാര്‍ഗങ്ങള്‍ ഇറാന്‍ കണ്ടെത്തിക്കഴിഞ്ഞതായും എന്നാല്‍ അത് വെളിപ്പെടുത്താനാവില്ലെന്നും അദ്ദേഹം അറിയിച്ചു. ഇറാന്റെ എണ്ണ വിതരണം പൂര്‍ണമായി നിര്‍ത്തലാക്കാമെന്നത് അമേരിക്കയുടെ വ്യാമോഹം മാത്രമാണെന്നും രാജ്യം എണ്ണ വില്‍പ്പന തുടരുമെന്നും മന്ത്രി പറഞ്ഞു.