ടാറ്റാ കൺസൾട്ടൻസി സർവീസസ് ലിമിറ്റഡിനെ (ടിസിഎസ്) 2018 - 19 കാലയളവിലെ ലോകത്തിലെ മൂന്നാമത്തെ വലിയ സോഫ്റ്റ്വെയർ സേവന ദാതാക്കളായി തിരഞ്ഞെടുത്തു. ഡിഎക്സ്സി ടെക്നോളജി കമ്പനിയെ മറികടന്നാണ് ടിസിഎസ് മൂന്നാം സ്ഥാനത്ത് എത്തിയത്. രണ്ട് വർഷത്തിനിടയിൽ ഐടി മേഖലയിൽ നടന്ന ഏറ്റവും വലിയ മാറ്റങ്ങളിലൊന്നാണ് ടിസിഎസിന്റെ ഈ നേട്ടം.
ഡിഎക്സ്സി ടെക്നോളജിയുടെ നാലാം പാദ വാർഷിക റിപ്പോർട്ട് മേയ് 23ന് പ്രഖ്യാപിക്കും. ഇതിന് മുമ്പാണ് ടിസിഎസ് മൂന്നാം സ്ഥാനം കരസ്ഥമാക്കിയിരിക്കുന്നത്. മാർച്ച് 31 ന് അവസാനിച്ച സാമ്പത്തിക പാദത്തിൽ ടിസിഎസ് 9.6% വളർച്ച കൈവരിച്ചു. അതായത്, 1.82 ബില്യൺ ഡോളരാണ് പുതിയ ബിസിനസിലേക്ക് നീക്കിവച്ചിരിക്കുന്നത്.
2018-19 സാമ്പത്തിക വർഷത്തെ ആദ്യ ഒമ്പതു മാസത്തിൽ ടിസിഎസ് 15.52 ബില്യൻ ഡോളർ വരുമാനം നേടി. എന്നാൽ ഇതേ സമയം ഡിഎക്സ്സി നേടിയ വരുമാനം 15.47 ബില്യൺ ഡോളറാണ്. രണ്ട് വർഷത്തിനിടെ ടിസിഎസ് ഏറ്റവും മികച്ച പ്രകടനം കാഴ്ചവച്ചതാണ് ഈ നേട്ടത്തിന് കാരണം. അതേ സമയം ഡിഎക്സ്സി ബിസിനസുകളിൽ ഭൂരിഭാഗവും വിഭജിക്കുകയും പുനർക്രമീകരിക്കുകയും ചെയ്തതോടെ വരുമാനത്തിൽ ഇടിവുണ്ടായി.
2017ൽ ആരംഭിച്ച ഡിഎക്സ്സി ടെക്നോളജി ആ വർഷം തന്നെ 25.39 ബില്ല്യൺ ഡോളറിന്റെ വരുമാനമുണ്ടാക്കിയിരുന്നു. അതേ സമയം 2017ൽ ടിസിഎസ് 17.57 ബില്യൺ ഡോളറാണ് വരുമാനമായി നേടിയത്. അതായത് കഴിഞ്ഞ രണ്ട് വർഷക്കാലത്ത് ഡിഎക്സ്സിയുടെ വരുമാനം നാല് ബില്യൺ ഡോളർ കുറയുകയും ടിസിഎസ് 3.34 ബില്യൺ ഡോളർ അധിക വരുമാനം നേടുകയും ചെയ്തു. ഐബിഎം കഴിഞ്ഞ വർഷം 79.59 ബില്യൺ ഡോളർ വരുമാനമാണ് നേടിയത്. ആക്സഞ്ചറിന്റെ കഴിഞ്ഞ വർഷത്തെ വരുമാനം 39.57 ബില്ല്യൺ ഡോളർ ആയിരുന്നു.
malayalam.goodreturns.in