ചൈനീസ് ടെക് ഭീമനായ ഷവോമിയുടെ സബ് ബ്രാൻഡ് റെഡ്മി ഏറ്റവും പുതിയ ഫോൺ അടുത്ത ആഴ്ച്ച പുറത്തിറക്കുമെന്ന് റിപ്പോർട്ട്. റെ‍ഡ്മി കെ20 പ്രോ എന്നാണ് ഫോണിന്റെ പേരെന്നും മേയ് 14 ന് ഉൽപ്പന്നം അവതരിപ്പിക്കുമെന്നുമാണ് പുറത്തു വന്നിരിക്കുന്ന വിവരം. എന്നാൽ ഇത് സംബന്ധിച്ച് കമ്പനി ഔദ്യോ​ഗിക പ്രഖ്യാപനങ്ങളൊന്നും നടത്തിയിട്ടില്ല.

ഫോണിന്റെ ടീസർ വൈറലായതോടെ, ടെക് ലോകത്ത് പുതിയ ഫോണിന്റെ പേര് സംബന്ധിച്ച് നിരവധി ഊഹാപോഹങ്ങളാണ് നടക്കുന്നത്. പുറത്തിറക്കാൻ ഏതാനും ദിവസങ്ങൾ മാത്രം അവശേഷിക്കെ ഒരു വെബ്സൈറ്റ് ഫോണിന്റെ സുരക്ഷാ കവറിന്റെ ചിത്രത്തോടോപ്പം ഫോണിന്റെ പേര് റെ‍ഡ്മി കെ20 പ്രോ എന്നായിരിക്കുമെന്നും റിപ്പോർട്ട് ചെയ്തിട്ടുണ്ട്. 2019 മേയ് 1ന് ഒരു സോഷ്യൽ മീഡിയ പോസ്റ്റിൽ റെഡ്മിയുടെ ജനറൽ മാനേജർ ലു വെയ്ബിം​ഗ് ഉടൻ പുറത്തിറക്കാനിരിക്കുന്ന ഫോണിന്റെ പേര് വളരെ മികച്ചതായിരിക്കുമെന്നും വ്യക്തമാക്കിയിരുന്നു.

ഇത് റെഡ്മിയുടെ ഫ്ലാ​ഗ്ഷിപ്പ് മോഡലായിരിക്കുമെന്നും സ്നാപ്ഡ്രാഗൺ 855 ചിപ്സെറ്റാണ് ഫോണിൽ ഉപയോ​ഗിച്ചിരിക്കുന്നതെന്നും ഇദ്ദേഹം വ്യക്തമാക്കിയിരുന്നു. കൂടാതെ മികച്ച പ്രകടനം, ദൈർഘ്യമേറിയ ബാറ്ററി ലൈഫ്, മെച്ചപ്പെട്ട ക്യാമറ, ഉയർന്ന സ്ക്രീൻ അനുപാതം എന്നിവയായിരിക്കും ഫോണിന്റെ പ്രത്യേകതകളെന്നും സോഷ്യൽ മീഡിയ പോസ്റ്റിൽ ലു വെയ്ബിം​ഗ് അറിയിച്ചിരുന്നു. ക്വാൽകോമിന്റെ മുൻനിര പ്രോസസറായ സ്നാപ്ഡ്രാഗൺ 855 ഉപയോ​ഗിക്കുന്ന റെ‍ഡ്മിയുടെ ആദ്യത്തെ ഫോണായിരിക്കും ഇത്.

2019ൽ ഇതുവരെ റെ‍ഡ്മി അഞ്ച് ഫോണുകളാണ് അവതരിപ്പിച്ചിരിക്കുന്നത്. റെഡ്മി നോട്ട് 7, റെഡ്മി നോട്ട് 7 പ്രോ, റെഡ്മി ഗോ, റെഡ്മി വൈ 3, റെഡ്മി 7 എന്നിവയാണ് റെ‍‍ഡ്മിയുടെ ഏറ്റവും പുതിയ മോഡലുകൾ.

malayalam.goodreturns.in