ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷൻ (ഐ.ആർ.സി.ടി.സി.) വഴിയുള്ള ഇ - ടിക്കറ്റ് ബുക്കിംഗ് സേവനം ഇന്നും നാളെയും ഭാ​ഗികമായി തടസ്സപ്പെടും. ഐആർസിടിസി വെബ്സൈറ്റ് മുന്നറിയിപ്പ് പ്രകാരം ഇന്ന് വെളുപ്പിന് 12 മുതൽ ഉച്ചയ്ക്ക് 2:30 വരെ ഓൺലൈനായി ടിക്കറ്റുകൾ ബുക്ക് ചെയ്യാൻ സാധിക്കില്ല. ടിക്കറ്റ് ബുക്കിം​ഗ് മാത്രമല്ല, തത്കാൽ ടിക്കറ്റ് ബുക്കിം​ഗ്, ട്രെയിൻ ടിക്കറ്റ് റദ്ദാക്കൽ, മറ്റ് ബന്ധപ്പെട്ട സേവനങ്ങൾ എന്നിവയും ഈ കാലയളവിൽ ലഭ്യമല്ല.

ഡൽ​ഹി മേഖലയിലുള്ള ടിക്കറ്റുകൾ ഇന്ന് രാത്രി 11.45 മുതൽ നാളെ (മേയ് 19) രാവിലെ 5 വരെയും ബുക്ക് ചെയ്യാനോ ക്യാൻസൽ ചെയ്യാനോ സാധിക്കില്ല. വെബ്സൈറ്റിന്റെ മെയിന്റനൻസിന് വേണ്ടിയാണ് പ്രവർത്തനങ്ങൾ താത്ക്കാലികമായി നിർത്തി വച്ചിരിക്കുന്നത്. പ്രവർത്തനം നിർത്തി വച്ചതിൽ ഖേ​ദിക്കുന്നതായും ഇന്ത്യൻ റെയിൽവേ അറിയിച്ചു.

ഈ ആഴ്ച്ച ആദ്യം തത്ക്കാൽ ട്രെയിൻ ടിക്കറ്റുകൾ ബുക്ക് ചെയ്യുന്നതിനും തടസ്സം നേരിട്ടിരുന്നു. അതിനു പിന്നാലെയാണ് ഇപ്പോൾ ഐആർസിടിസി വഴിയുള്ള എല്ലാ വിധ ഓൺലൈൻ സേവനങ്ങളും പ്രവർത്തന രഹിതമായിരിക്കുന്നത്. മെയിന്റനൻസ് കാരണം ഇ - ടിക്കറ്റിംഗ് സേവനം ലഭ്യമല്ലെന്നും പിന്നീട് വീണ്ടും ശ്രമിക്കുവാനുമാണ് ഉപഭോക്താക്കൾക്ക് നിർദ്ദേശം ലഭിക്കുന്നത്.

ടിക്കറ്റുകൾ ക്യാൻസൽ ചെയ്യാൻ കസ്റ്റമർ കെയർ നമ്പറുകളായ 0755-6610661, 0755-4090600, 0755-3934141 ഇവയിൽ ഏതെങ്കിലും ഒന്നിൽ ബന്ധപ്പെടാവുന്നതാണ്. അല്ലെങ്കിൽ eticketirctc.co.in എന്ന മെയിൽ ഐഡിയിലേയ്ക്ക് മെസേജുകൾ അയച്ചും ബന്ധപ്പെടാമെന്ന് ഇന്ത്യൻ റെയിൽവേ അറിയിച്ചു. ട്രെയിൻ ടിക്കറ്റുകൾ ബുക്ക് ചെയ്യുന്നതിനും ക്യാൻസൽ ചെയ്യുന്നതിനും ഇന്ന് ഏറ്റവുമധികം ആളുകൾ ഉപയോ​ഗിക്കുന്നത് ഐആർസിടി വെബ്സൈറ്റാണ്.

malayalam.goodreturns.in