ടെലികോം മേഖലയിൽ എയർടെൽ, വൊഡാഫോൺ, ഐഡിയ തുടങ്ങിയ അതികായന്മാരെ ജിയോയുടെ വരവോടെ നിഷ്പ്രയാസം ഒതുക്കിയ മുകേഷ് അംബാനി അടുത്ത പദ്ധതിയുമായി രം​ഗത്ത്. ഓൺലൈൻ ഷോപ്പിം​ഗ് രം​ഗത്തെ തലവന്മാരായ ഫ്ലിപ്കാർട്ടിനും ആമസോണിനും ഭീഷണിയായി ആകും റിലയൻസിന്റെ പുതിയ റീട്ടെയിൽ സംരംഭം പുറത്തിറക്കുക. മുകേഷ് അംബാനിയുടെ റിലയൻസ് റീട്ടെയിൽ ബിസിനസ്, ആമസോൺ, വാൾമാർട്ടിന്റെ കീഴിലുള്ള ഫ്ളിപ്കാർട്ട് എന്നീ വിപണികൾക്ക് വലിയ വെല്ലുവിളിയാകുമെന്നാണ് റിപ്പോർട്ടുകൾ.

ആഗോള വിപണി ഗവേഷണ കമ്പനിയായ ഫോർറെസ്റ്ററിൻെറ കണക്കനുസരിച്ച്, ഇന്ത്യയിലെ ഓൺലൈൻ വ്യാപാരം അഞ്ചു വർഷത്തിനിടെ 25.8 ശതമാനം വളർച്ച നേടുമെന്നുമാണ് റിപ്പോർട്ട് 2023 ഓടെ ഓൺലൈൻ വ്യാപാരത്തിലൂടെയുള്ള വരുമാനം 85 ബില്യൺ ഡോളർ ആകുമെന്നും റിപ്പോർട്ടിൽ പറയുന്നു. 6,600ൽ കൂടുതൽ നഗരങ്ങളിലായി 10,415ൽ അധികം സ്റ്റോറുകൾ ആരംഭിക്കുകയാണ് റിലയൻസ് റീട്ടെയിൽസിന്റെ ലക്ഷ്യം.

ജിയോ ഓഫറുകൾ പോലെ റിലയൻസ് റീട്ടെയ്ൽ വഴി വമ്പിച്ച ഡിസ്കൗണ്ടുകൾ നൽകാൻ തുടങ്ങിയാൽ ആമസോൺ, ഫ്ലിപ്കാർട്ട് എന്നിവയുടെ പ്രവർത്തനങ്ങളെ പ്രതികൂലമായി ബാധിക്കാനിടയുണ്ടെന്ന് ഫോറെസ്റ്റർ റിസേർച്ച് സീനിയർ ഫോർകാസ്റ്റ് അനലിസ്റ്റ് സതീഷ് മീന വ്യക്തമാക്കി.

മൺസൂൺ ഹം​ഗാമ ഓഫറുമായി 2003 ലാണ് റിലയൻസ് ടെലികോം രം​ഗത്ത് പ്രവേശിക്കുന്നത്. ഇതോടെ മിനിറ്റിന് രണ്ട് രൂപ നിരക്ക് ആയിരുന്ന വോയിസ് കോളുകൾ മിനിറ്റിന് 0.40 എന്ന നിരക്കിലേയ്ക്ക് കുറഞ്ഞു. തുടർന്ന് 2016ൽ ജിയോ 4 ജി പ്ലാനുമായി രം​ഗത്തെത്തിയതോടെ 250 രൂപയുടെ ഡേറ്റാ പ്ലാനുകൾ വെറും 50 രൂപയ്ക്ക് ലഭിക്കാൻ തുടങ്ങി. ഈ രീതി തന്നെയാകും റിലയൻസ് റീട്ടെയ്ൽ ബിസിനസിലും തുടരുക. ഇത്തരത്തിലുള്ള ഇളവുകൾ എതിരാളികളെയും സാധനങ്ങളുടെയും സേവനങ്ങളുടെയും വില കുറയ്ക്കാൻ നിർബന്ധിതരാക്കും.

malayalam.goodreturns.in