ആഗോള വിപണിയിൽ ഇന്ന് സ്വർണ വില കുത്തനെ കൂടി. രണ്ട് മാസത്തിനിടയിലെ ഏറ്റവും ഉയർന്ന വിലയിലാണ് ഇന്ന് വ്യാപാരം നടക്കുന്നത്. നിക്ഷേപകരുടെ സുരക്ഷിതമായ നിക്ഷേപ മാർഗമാണ് സ്വർണം. ചൈന-അമേരിക്ക വ്യാപാര യുദ്ധം രൂക്ഷമാകുന്നതോടെ ആഗോള സാമ്പത്തിക മാന്ദ്യം മുന്നിൽ കണ്ടാണ് സ്വർണ വില കുത്തനെ ഉയർന്നത്.
ആഗോള വിപണിയിലെ സ്വർണ വില
സ്വർണ്ണ വില 0.5 ശതമാനം ഉയർന്ന് ഔൺസിന് 1,311.15 ഡോളറാണ് ഇന്നത്തെ വില. മാർച്ച് 28ന് 1,311.44 ഡോളർ ആയിരുന്നു സ്വർണ വില. അതിനു ശേഷമുള്ള ഏറ്റവും ഉയർന്ന വിലയാണ് ഇന്നത്തേത്. യുഎസ് ഗോൾഡ് ഫ്യൂച്ചർ നിരക്ക് 0.4 ശതമാനം ഉയർന്ന് ഔൺസിന് 1,314.40 ഡോളറായാണ് ഉയർന്നത്.
സംസ്ഥാനത്തെ സ്വർണ വില
സംസ്ഥാനത്ത് സ്വര്ണവില കുറഞ്ഞു. സ്വര്ണം ഗ്രാമിന് 10 രൂപയും പവന് 80 രൂപയുമാണ് ഇന്ന് കുറഞ്ഞത്. ഗ്രാമിന് 3,010 രൂപയും പവന് 24,080 രൂപയുമാണ് ഇന്നത്തെ സ്വര്ണ നിരക്ക്. ഇന്നലെ പവന് 24,160 രൂപയും ഗ്രാമിന് 3,020 രൂപയുമായിരുന്നു നിരക്ക്. വെള്ളിക്ക് ഗ്രാമിന് 42 രുപയാണ് ഇന്നത്തെ നിരക്ക്.
ചൈന - അമേരിക്ക വ്യാപാരയുദ്ധം
ലോകത്തിലെ ഏറ്റവും വലിയ സാമ്പത്തിക ശക്തികൾ തമ്മിലുള്ള വ്യാപാരയുദ്ധം സാമ്പത്തിക അരക്ഷിതാവസ്ഥയെ കൂടുതൽ മോശമാക്കുമെന്നാണ് ഒട്ടുമിക്ക സാമ്പത്തിക വിദഗ്ധരുടെയും അഭിപ്രായം. യൂറോപ്യൻ യൂണിയൻ, മെക്സികോ, കാനഡ എന്നിവരുടെമേൽ അധിക നികുതി ചുമത്തിക്കൊണ്ട് അമേരിക്ക ആരംഭിച്ചിരിക്കുന്ന സാമ്പത്തിക യുദ്ധത്തിന്റെ തുടർച്ച തന്നെയാണ് ചൈനയുടെ മേലും പ്രയോഗിച്ചിരിക്കുന്നത്.
സ്വർണം സുരക്ഷിത നിക്ഷേപം
സുരക്ഷിതമായ നിക്ഷേപ മാർഗങ്ങളിൽ ഒന്നെന്ന നിലയിൽ സ്വർണത്തിന് എക്കാലത്തും ഡിമാൻഡ് കൂടുതലാണ്. പണപ്പെരുപ്പത്തെ നേരിടാനുള്ള ഏറ്റവും സുരക്ഷിതമായ ഒരു നിക്ഷേപം കൂടിയാണിത്. സാമ്പത്തിക മാന്ദ്യം, ആഗോള രാഷ്ട്രീയ അനിശ്ചിതത്വങ്ങൾ എന്നീ ഘട്ടങ്ങളിലെല്ലാം സ്വർണത്തിന് നിക്ഷേപം എന്ന നിലയിൽ ഡിമാൻഡ് വളരെ കൂടുതലാണ്. ഉയർന്ന പണപ്പെരുപ്പമുള്ള വർഷങ്ങളിൽ ഓഹരി വിപണി ഇടിഞ്ഞപ്പോഴും സ്വർണത്തിന്റെ മൂല്യത്തിന് കാര്യമായി മങ്ങലേറ്റിരുന്നില്ല.
malayalam.goodreturns.in