ഫിക്സ‍‍ഡ് ഡിപ്പോസിറ്റ്

സ്ഥിര നിക്ഷേപത്തിന്റെ (എഫ്ഡി) പലിശ നിരക്കുകൾ ഉടൻ കുറയാൻ സാധ്യതയുണ്ടെന്ന് സാമ്പത്തിക വിദ​ഗ്ധർ പറയുന്നു. കാലാവധി, നിക്ഷേപ തുക എന്നിവയ്ക്ക് അനുസരിച്ച് ഓരോ വർഷവും 3.50 ശതമാനം മുതൽ 7.30 ശതമാനം വരെയാണ് നിലവിലെ എഫ്ഡി നിക്ഷേപങ്ങളുടെ പലിശ നിരക്ക്. ആർബിഐ റിപ്പോ നിരക്ക് കുറച്ചതോടെ വിവിധ ബാങ്കുകൾ എഫ്ഡി പലിശ നിരക്ക് കുറയ്ക്കാനുള്ള തയ്യാറെടുപ്പിലാണ്. പലിശ നിരക്ക് കുറയ്ക്കുന്നതിന് മുമ്പ് പുതിയ നിക്ഷേപം നടത്തുന്നതാണ് നിക്ഷേപകർക്ക് നേട്ടം.

വിവിധ തരത്തിലുള്ള ഫിക്സഡ് ഡിപ്പോസിറ്റുകൾ

സ്റ്റാൻഡാർഡ് ഫിക്സഡ് ഡിപ്പോസിറ്റ്, ഫ്ളോട്ടിങ്ങ് റേറ്റ് ഫിക്സ‍ഡ് ഡിപ്പോസിറ്റ് എന്നിങ്ങനെ വിവിധ തരത്തിലുള്ള ഫിക്സഡ് ഡിപ്പോസിറ്റുകളുണ്ട്. ഏഴ് മുതൽ 10 വർഷം വരെയുളള സ്ഥിര നിക്ഷേപ പദ്ധതികളാണ് സ്റ്റാൻഡാർഡ് ഫിക്സഡ് ഡെപ്പോസിറ്റ്. ഈ കാലയളവിലെല്ലാം ഒരേ പലിശ നിരക്കാണ് നിക്ഷേപകർക്ക് ലഭിക്കുക. ഫ്ളോട്ടിം​ഗ് റേറ്റ് സ്ഥിര നിക്ഷേപ പ്രകാരം പലിശ നിരക്കിലുള്ള ഓരോ വ്യത്യാസത്തിന് അനുസരിച്ച് നിക്ഷേപത്തിലൂടെ കൂടുതൽ നേട്ടമുണ്ടാക്കാം.

ഫിക്സഡ് ഡിപ്പോസിറ്റിന് കൂടുതൽ പലിശ നൽകുന്ന ബാങ്കുകൾ

ഫിക്സഡ് ഡിപ്പോസിറ്റിന് താരതമ്യേന കൂടുതൽ പലിശ നൽകുന്ന ചില ബാങ്കുകൾ താഴെ പറയുന്നവയാണ്.

• ആക്സിസ് ബാങ്ക്
• ബാങ്ക് ഓഫ് ബറോഡ
• ബാങ്ക് ഓഫ് ഇന്ത്യ
• കാനറാ ബാങ്ക്
• സെൻട്രൽ ബാങ്ക് ഓഫ് ഇന്ത്യ
• എച്ച്‍ഡിഎഫ്സി ബാങ്ക്
• ഐസിഐസിഐ ബാങ്ക്
• സ്റ്റേറ്റ് ബാങ്ക് ഓഫ് ഇന്ത്യ
• യെസ് ബാങ്ക്



കമ്പനി ഡിപ്പോസിറ്റ്

ബാങ്ക് ഫിക്സഡ് ഡിപ്പോസിറ്റുകളേക്കാൾ ലാഭകരമായ മറ്റൊരു നിക്ഷേപ മാർ​ഗമാണ് കമ്പനി ഡിപ്പോസിറ്റ്. എന്നാൽ
കമ്പനിയെക്കുറിച്ചുള്ള റേറ്റിങ് പരിശോധിച്ച് മാത്രമേ നിക്ഷേപം നടത്താവൂ. ഒരു വർഷം മുതൽ മൂന്നു വർഷം വരെയുള്ള കാലാവധികളിലെ നിക്ഷേപം തിരഞ്ഞെടുക്കുന്നതാണ് കൂടുതൽ നല്ലത്. മികച്ച കമ്പനികളാണ് നിങ്ങൾ നിക്ഷേപത്തിനായി തിരഞ്ഞെടുക്കുന്നതെങ്കിൽ ബാങ്ക് നിക്ഷേപം പോലെ സുരക്ഷിതമാണ് കമ്പനി ഡിപ്പോസിറ്റും.