ന്യൂഡല്‍ഹി:ധനമന്ത്രി നിര്‍മ്മല സീതാരാമന്‍ മുന്‍ പ്രധാനമന്ത്രി മന്‍മോഹന്‍ സിംഗുമായി കൂടിക്കാഴ്ച നടത്തി. മന്‍മോഹന്‍ സിംഗിന്റെ ദില്ലിയിലുള്ള വസതിയില്‍ വച്ചായിരുന്നു കൂടിക്കാഴ്ച നടത്തിയത്.

1991 ല്‍ അദ്ദേഹം നരസിംഹറാവു സര്‍ക്കാരില്‍ ധനമന്ത്രിയായിരുന്നപ്പോള്‍ ഡോ. മന്‍മോഹന്‍ നടത്തിയ സാമ്പത്തിക പരിഷ്‌കാരങ്ങള്‍ വളരെ മികച്ച രീതിയിലുള്ളതായിരുന്നു.മുപ്പത് വര്‍ഷത്തിനിടെ ഇതാദ്യമായാണ് ബജറ്റ് സമ്മേളനത്തില്‍ മന്‍മോഹന്‍ സിംഗ് പാര്‍ലമെന്റില്‍ ഇല്ലാത്തത്. കഴിഞ്ഞ മൂന്ന് പതിറ്റാണ്ടു കാലമായി അദ്ദേഹം രാജ്യസഭയിലെ അംഗമായിരുന്നു.

രണ്ടാം മോഡി സര്‍ക്കാരിന്റെ ധനമന്ത്രിയായി ചുമതലയേറ്റ ശേഷം നിര്‍മല സീതാരാമന്റെ ആദ്യ കേന്ദ്ര ബജറ്റ് പാര്‍ലമെന്റില്‍ അവതരിപ്പിക്കുന്നതിന് ദിവസങ്ങള്‍ക്ക് മുമ്പാണ് ഈ കൂടിക്കാഴ്ച നടത്തിയത്.ഇന്ത്യയുടെ ആദ്യത്തെ മുഴുവന്‍ സമയ വനിതാ ധനമന്ത്രിയാണ് നിര്‍മ്മല സീതാരാമന്‍.ജൂലൈ അഞ്ചിനാണ് നിര്‍മ്മല സീതാരാമന്റെ ആദ്യ ബജറ്റ്.