ബാം​ഗ്ലൂരിൽ ഇനി ഫ്ലാറ്റ് നോക്കേണ്ട; അടുത്ത അഞ്ച് വർഷത്തേയ്ക്ക് കെട്ടിട നിർമ്മാണങ്ങൾക്ക് നിരോധനം

അടിസ്ഥാന സൗകര്യങ്ങൾ

നഗരത്തിൽ ആവശ്യത്തിൽ അധികം അപ്പാർട്ടുമെന്റുകൾ നിർമ്മിക്കുന്നുണ്ടെങ്കിലും അവ വിൽക്കുമ്പോൾ കുടിവെള്ളം പോലുള്ള അടിസ്ഥാന സൗകര്യങ്ങൾ ഉറപ്പു വരുത്തുന്നില്ല. നിലവിലുള്ള വിഭവങ്ങളുടെ ചൂഷണം മൂലമാണ് ചെന്നൈ പോലുള്ള മെട്രോ ന​ഗരങ്ങളിൽ ഇപ്പോൾ ജലപ്രതിസന്ധി രൂക്ഷമായിരിക്കുന്നത്. ബാം​ഗ്ലൂരിലും ഈ സ്ഥിതി ഉണ്ടാകാതിരിക്കാനാണ് സർക്കാർ നിയന്ത്രണങ്ങൾ ഏർപ്പെടുത്താൻ തീരുമാനിച്ചിരിക്കുന്നതെന്നും അ​ദ്ദേഹം പറഞ്ഞു.

കുടിയേറ്റം വർദ്ധിച്ചു

ആസൂത്രിതമല്ലാത്ത കുടിയേറ്റവും ദ്രുതഗതിയിലുള്ള വളർച്ചയുമാണ് ഇത്തരത്തിലുള്ള പ്രശ്നങ്ങൾക്ക് പ്രധാന കാരണം. സ്വന്തം വിഭവങ്ങൾ പുനരുജ്ജീവിപ്പിക്കുന്നതിനു പകരം ചുറ്റുമുള്ള ജില്ലകളെ ഉപയോ​ഗപ്പെടുത്തിയാണ് നഗരത്തിലേക്ക് വെള്ളം എത്തിക്കുന്നത്. എന്നാൽ ബാം​ഗ്ലൂരിലുണ്ടായിരുന്ന പല തടാകങ്ങളും മലിനമാക്കിയതോടെ ഉപയോ​​ഗശൂന്യമായി മാറി. രാജ്യത്തെ മറ്റ് സംസ്ഥാനങ്ങളെപ്പോലെ തന്നെ കർണാടകയിലും മഴ ഇല്ലാത്തതിനാൽ നദികളും ജലസംഭരണികളും വറ്റി കടുത്ത വരൾച്ചയാണ് നേരിടുന്നത്.

വെള്ളത്തിന്റെ ​ഗുണനിലവാരം മോശം

അപ്പാർട്ടുമെന്റുകളിൽ ലഭിക്കുന്ന വെള്ളത്തിന്റെ ഗുണനിലവാരം പോലും മോശമാണെന്നും പരമേശ്വര പറഞ്ഞു. അപ്പാർട്ടുമെന്റുകളിൽ ഭൂരിഭാഗവും കുഴൽക്കിണറുകളെയോ അശുദ്ധമായ തടാകങ്ങളിൽ നിന്ന് എടുക്കുന്ന വെള്ളം ശുദ്ധീകരിച്ചെത്തിക്കുന്ന ടാങ്കറുകളെയോ ആണ് ആശ്രയിക്കുന്നത്. ​ഇത് പല തരത്തിലുള്ള ആരോഗ്യ പ്രശ്നങ്ങൾക്കും കാരണമാകും.

​ഗതാ​ഗതക്കുരുക്ക്

അപ്പാർട്ടുമെന്റുകടെ എണ്ണം കൂടുന്നതിന് അനുസരിച്ച് ന​ഗരത്തിൽ ​ഗതാഗതക്കുരുക്കും വർ​ദ്ധിച്ചു കൊണ്ടിരിക്കുകയാണ്. ഓരോ ദിവസവും 1,500 പുതിയ വാഹനങ്ങളാണ് ന​ഗരത്തിലെ റോഡിലേക്ക് പ്രവേശിക്കുന്നത്. 7.5 മില്യണിലധികം വാഹനങ്ങളും ജനസംഖ്യ 10 മില്യണിലധികവുമാണെന്നും അദ്ദേഹം വ്യക്തമാക്കി. സംസ്ഥാന സർക്കാർ ബന്ധപ്പെട്ട അധികൃതരുമായി ചർച്ച നടത്തുമെന്നും വിഷയത്തിൽ അഭിപ്രായം തേടുമെന്നും ഉപമുഖ്യമന്ത്രി പറഞ്ഞു.