ദില്ലി: സ്റ്റാര്‍ട്ട് അപ്പ് മേഖലയുടെ കുതിപ്പിന് ബജറ്റില്‍ 20000 കോടി രൂപയോളം മാറ്റി വെയ്ക്കാന്‍ സാധ്യതയുണ്ടെന്ന് റിപ്പോര്‍ട്ട്. സ്റ്റാര്‍ട്ടപ്പുകള്‍ക്കുള്ള ഫണ്ടിങ് ഉറപ്പാക്കുന്ന ഫണ്ടാണ് പ്രധാനമായും ലക്ഷ്യമിടുന്നത്.

മോദി സര്‍ക്കാര്‍ ഈ മേഖലയില്‍ കൂടുതല്‍ ശ്രദ്ധ കേന്ദ്രീകരിക്കുമെന്ന് കഴിഞ്ഞ പ്രകടന പത്രികയിലും ഉറപ്പ് നല്‍കിയിട്ടുണ്ട്. വ്യാഴാഴ്ച പ്രസിദ്ധീകരിച്ച സാമ്പത്തിക സര്‍വെ റിപ്പോര്‍ട്ടും ഈ മേഖലയില്‍ കൂടുതല്‍ പണം ഉറപ്പാക്കേണ്ടതിന്റെ പ്രാധാന്യം വ്യക്തമാക്കിയിട്ടുണ്ട്.

സ്റ്റാര്‍ട്ടപ്പുകള്‍ക്ക് ഒട്ടേറെ നികുതി ആനുകൂല്യങ്ങളും സര്‍ക്കാറിന്റെ പരിഗണനയിലുണ്ട്. പുതുമയുള്ള ബിസിനസ് സംരംഭങ്ങളെ കണ്ടെത്തുകയും പ്രോത്സാഹിപ്പിക്കുയുമാണ് ലക്ഷ്യം. നേരത്തെ സിഡ്ബിയിലൂടെയും അള്‍ട്ടര്‍നേറ്റ് ഇന്‍വെസ്റ്റ്‌മെന്റ് ഫണ്ട്‌സിലൂടെയുമാണ് സര്‍ക്കാര്‍ ഈ മേഖലയില്‍ ഇടപെട്ടിരുന്നത്.

വ്യക്തിഗത നിക്ഷേപകരെ പ്രതികൂലമായി ബാധിക്കുന്ന ക്യാപ്പിറ്റല്‍ ഗെയിന്‍ ടാക്‌സിന്റെ കാര്യത്തിലും ചില തിരുത്തലുകള്‍ ബജറ്റില്‍ ഉണ്ടാകുമെന്ന് ബിസിനസ് ലോകം പ്രതീക്ഷിക്കുന്നുണ്ട്.