എയര്‍ ഇന്ത്യയില്‍ പുതിയ നിയമനങ്ങളും സ്ഥാനക്കയറ്റങ്ങളും തത്ക്കാലം നിര്‍ത്തിവയ്ക്കാന്‍ കേന്ദ്രസര്‍ക്കാര്‍ നിര്‍ദേശം. എയര്‍ ഇന്ത്യ സ്വകാര്യവത്ക്കരണത്തിന്റെ ഭാഗമായാണ് പുതിയ നീക്കമെന്നാണ് വിലയിരുത്തല്‍. പൊതുമേഖല വിമാനകമ്പനിയായ എയര്‍ ഇന്ത്യയെ സ്വകാര്യവത്ക്കരിക്കാനുളള നടപടിക്രമങ്ങള്‍ അന്തിമഘട്ടത്തിലാണ്. ഈ സാഹചര്യത്തില്‍ പുതിയ സ്ഥാനക്കയറ്റങ്ങളും നിയമനങ്ങളും നടത്തേണ്ടതില്ല. അത്യാവശ്യമാണെങ്കില്‍ മാത്രം പുതിയ വിമാനസര്‍വ്വീസുകള്‍ തുടങ്ങിയാല്‍ മതിയാകും.

സുപ്രധാന തീരുമാനങ്ങളൊന്നും ഈ സമയത്ത് കൈക്കൊള്ളേണ്ടതില്ലെന്നും ഡിപ്പാര്‍ട്ട്‌മെന്റ് ഓഫ് ഇന്‍വെസ്റ്റ്‌മെന്റ് ആന്റ് പബ്ലിക് അസറ്റ് മാനേജ്‌മെന്റിന്റെ നിര്‍ദേശങ്ങളില്‍ പറയുന്നു.  മോദിസര്‍ക്കാര്‍ നേരത്തെ എയര്‍ ഇന്ത്യ ഓഹരികള്‍ വിറ്റഴിക്കാന്‍ ശ്രമിച്ചിരുന്നെങ്കിലും ആരും വാങ്ങാന്‍ തയ്യാറായിരുന്നില്ല.

നിലവില്‍ ഏതാണ്ട് 58,000 കോടി രൂപയുടെ ബാധ്യതയാണ് എയര്‍ ഇന്ത്യയ്ക്കുളളത്. 2019 മാര്‍ച്ച് 31 ലെ കണക്കനുസരിച്ച് 7,600 കോടി രൂപയുടെ നഷ്ടമാണ് എയര്‍ ഇന്ത്യയ്ക്കുളളത്. അതിനാല്‍ ഈ സാഹചര്യത്തില്‍ എയര്‍ ഇന്ത്യയെ രക്ഷിക്കാന്‍ സ്വകാര്യവത്ക്കരണമല്ലാതെ മറ്റ് വഴിയില്ലെന്ന് സിവില്‍ വ്യോമയാന വകുപ്പ് മന്ത്രി ഹര്‍ദീപ് സിങ് പുരി കഴിഞ്ഞദിവസം അഭിപ്രായപ്പെട്ടിരുന്നു. എയര്‍ ഇന്ത്യ സ്വകാര്യവത്ക്കരണവുമായി ബന്ധപ്പെട്ട് ബാക്കിയുളള നടപടിക്രമങ്ങള്‍ അടുത്താഴ്ച കേന്ദ്രആഭ്യന്തരമന്ത്രി അമിത്ഷായുടെ നേതൃത്വത്തില്‍ കൂടിയാലോചിച്ച് തീരുമാനിക്കും.