ഫ്‌ളാറ്റിന്റെ അറ്റകുറ്റപ്പണിയിനത്തില്‍ റസിഡന്റ് വെല്‍ഫെയര്‍ അസോസിയേഷന് മാസം 7,500 രൂപയില്‍ കൂടുതല്‍ നല്‍കുന്നുണ്ടെങ്കില്‍ ഉടമകള്‍ ഇനി മുതല്‍ 18 ശതമാനം ജിഎസ്ടി നല്‍കേണ്ടി വരും. ഇത്തരം സാഹചര്യത്തില്‍ മുഴുവന്‍ തുകയ്ക്കും ജിഎസ്ടി ഈടാക്കാനാണ് കേന്ദ്ര ധനമന്ത്രാലയത്തിന്റെ തീരുമാനം.

മാസം തോറും ഫ്‌ളാറ്റ് അറ്റകുറ്റപ്പണിയ്ക്ക് 7,500 രൂപയില്‍ കൂടുതല്‍ നല്‍കിയാലും അസോസിയേഷനുകളുടെ വാര്‍ഷിക വിറ്റുവരവ് 20 ലക്ഷത്തിലധികമാണെങ്കിലും ജിഎസ്ടി ബാധകമായിരിക്കും. 7,500 രൂപയില്‍ കൂടുതലാണ് തുകയെങ്കില്‍ മുഴുവന്‍ തുകയ്ക്കും ജിഎസ്ടി നല്‍കേണ്ടിവരും. ഉദാഹരണമായി 9000 രൂപയാണ് അറ്റകുറ്റപ്പണി വകയില്‍ അസോസിയേഷന് കൊടുക്കുന്നതെങ്കില്‍ 7,500ന് മുകളിലുളള തുകയായ 1,500 രൂപയ്ക്ക് മാത്രം ജിഎസ്ടി നല്‍കിയാല്‍ മതിയാകില്ല. മറിച്ച് മുഴുവന്‍ 9,000 രൂപയ്ക്കും നല്‍കേണ്ടിവരും.

ഒരു റസിഡന്‍ഷ്യല്‍ കോംപ്ലക്‌സില്‍ ഉടമയ്ക്ക് ഒന്നോ അതിലധികമോ ഫ്‌ളാറ്റുകള്‍ ഉണ്ടെങ്കില്‍ ഓരോന്നിനും പ്രത്യേകം നികുതിയായിരിക്കും കണക്കാക്കുന്നത്. അല്ലാതെ എല്ലാ ഫ്‌ളാറ്റുകള്‍ക്കുമായി അറ്റകുറ്റപ്പണി വകയില്‍ നല്‍കുന്ന മൊത്തം തുകയല്ല കണക്കിലെടുക്കുന്നത്.

അതായത്‌ ഒരു റസിഡന്‍ഷ്യല്‍ കോംപ്ലക്‌സില്‍ രണ്ട് അപ്പാര്‍ട്ട്‌മെന്റുകള്‍ സ്വന്തമായി ഉളളവരുണ്ടാകും. ഇത്തരക്കാര്‍ മാസം 15,000 രൂപ അറ്റകുറ്റപ്പണി വകയില്‍ അസോസിയേഷന് നല്‍കുന്നുണ്ടാം. ഇത്തരം സന്ദര്‍ഭങ്ങളില്‍ ഓരോ അപ്പാര്‍ട്ട്‌മെന്റിനും ജിഎസ്ടിയില്‍ നിന്ന് ഒഴിവാകാന്‍ സാധിക്കും.

റസിഡന്റ് വെല്‍ഫെയര്‍ അസോസിയേഷനുകള്‍ക്ക് ഇന്‍പുട്ട് ടാക്‌സ് ക്രെഡിറ്റ് ക്ലെയിം ചെയ്യാനും അസരമുണ്ടായിരിക്കും. ജനറേറ്ററുകള്‍, വെളളത്തിന്റെ പമ്പുകള്‍, ലോണ്‍ ഫര്‍ണിച്ചര്‍, ടാപ്പുകള്‍, പൈപ്പുകള്‍, മറ്റു ഹാര്‍ഡ് വെയര്‍ എന്നിവയ്ക്ക് ഇന്‍പുട്ട് ടാക്‌സ് ക്രെഡിറ്റ് എടുക്കാന്‍ സാധിക്കും.