മുന്നിൽ വോഡഫോൺ – ഐഡിയ

നിലവില്‍ 32.22 കോടി ഉപയോക്താക്കള്‍ ജിയോയ്ക്കുണ്ട്. എയര്‍ടെലിനാകട്ടെ 32.03 കോടി വരിക്കാരും. വരിക്കാരുടെ എണ്ണത്തില്‍ കൊഴിഞ്ഞുപോക്കു തുടരുന്നുണ്ടെങ്കിലും, 38.75 കോടി ഉപയോക്താക്കളുള്ള വോഡഫോണ്‍ - ഐഡിയ കമ്പനിയാണ് പട്ടികയില്‍ ഏറ്റവും മുന്നില്‍.

കൊഴിഞ്ഞുപോക്ക്

പ്രതിമാസ റീചാര്‍ജ് വ്യവസ്ഥ നിര്‍ബന്ധമാക്കിയ പശ്ചാത്തലത്തിലാണ് എയര്‍ടെല്‍, വോഡഫോണ്‍ - ഐഡിയ, ടാറ്റ കമ്പനികള്‍ക്ക് വരിക്കാരെ നഷ്ടപ്പെടുന്നത്. മെയ്യിലെ കണക്കുകള്‍ പുറത്തുവരുമ്പോള്‍ 56.97 ലക്ഷം വരിക്കാരെയാണ് വോഡഫോണ്‍ - ഐഡിയ കൂട്ടായ്മയ്ക്ക് നഷടപ്പെട്ടത്. ഇതേകാലയളവില്‍ 15.08 ലക്ഷം ഉപയോക്താക്കളെ എയര്‍ടെലിനും നഷ്ടപ്പെട്ടു. 14 ലക്ഷം വരിക്കാര്‍ ടാറ്റയില്‍ നിന്നും കൊഴിഞ്ഞുപോയി.

പ്രതിമാസ റീചാർജ്

ഇന്‍ കമിങ് കോളുകള്‍ ലഭിക്കണമെങ്കില്‍ പ്രതിമാസം റീചാര്‍ജ് ചെയ്യണമെന്ന മാനദണ്ഡമാണ് ഈ കമ്പനികള്‍ മുന്നോട്ടു വെച്ചിരിക്കുന്നത്. എന്നാല്‍ ജിയോയ്ക്കും ബിഎസ്എന്‍എല്ലിനും ഇന്‍ കമിങ് കോളുകള്‍ ലഭിക്കാനായി പ്രതിമാസം റീചാര്‍ജ് ചെയ്യേണ്ടതില്ല. നിഷ്‌ക്രിയരായി തുടരുന്ന വരിക്കാരെ ഒഴിവാക്കുകയാണ് പ്രതിമാസ റീചാര്‍ജ് വ്യവസ്ഥയുടെ ലക്ഷ്യം.

സജീവ വരിക്കാർ

പുതിയ നടപടിയെ തുടര്‍ന്ന് ഓരോ ഉപയോക്താവില്‍ നിന്നുള്ള ശരാശരി വരുമാനം ഉയര്‍ത്താന്‍ എയര്‍ടെലിനും വോഡഫോണ്‍ - ഐഡിയയ്ക്കും കഴിഞ്ഞെന്നത് ഇവിടെ പ്രത്യേകം പരാമര്‍ശിക്കണം. നിലവില്‍ എയര്‍ടെലിനാണ് ഏറ്റവും കൂടുതല്‍ സജീവ വരിക്കാരുള്ളത്. ആകെയുള്ള 32.03 കോടി വരിക്കാരില്‍ 32 കോടി പേരും സജീവമായി എയര്‍ടെല്‍ സേവനങ്ങള്‍ ഉപയോഗിക്കുന്നു (99.86 ശതമാനം). 33.3 കോടി സജീവ വരിക്കാര്‍ വോഡഫോണ്‍ - ഐഡിയ കമ്പനികള്‍ക്കുണ്ട് (86 ശതമാനം).

ജിയോയിലേക്ക് കൂടുമാറ്റം

ഇതേസമയം, 32.22 കോടി ഉപയോക്താക്കള്‍ ജിയോയ്ക്കുണ്ടെങ്കിലും 26.8 കോടി വരിക്കാര്‍ മാത്രമേ സജീവമായി സേവനങ്ങള്‍ ഉപയോഗിക്കുന്നുള്ളൂ (83 ശതമാനം). എന്നാല്‍ ജിയോയിലേക്ക് ചേക്കേറുന്നവരുടെ എണ്ണം അടുത്തകാലത്തായി കൂടി വരികയാണെന്ന് ട്രായ് പുറത്തുവിട്ട കണക്കുകളില്‍ വ്യക്തം. മെയ് മാസം മാത്രം 80.2 ലക്ഷം വരിക്കാര്‍ ജിയോയില്‍ പുതുതായി ചേരുകയുണ്ടായി. ഇതേ കാലയളവില്‍ ബിഎസ്എന്‍എല്ലിനും 24,276 ഉപയോക്താക്കളെ അധികം ലഭിച്ചു.

കീശ ചോർത്താതെ ജിയോ

2016 സെപ്തംബര്‍ മുതലാണ് റിലയന്‍സ് ജിയോ ഇന്ത്യയില്‍ പ്രവര്‍ത്തനമാരംഭിച്ചത്. ജിയോയുടെ കടന്നുവരവാണ് കുതിച്ചുയര്‍ന്ന ടെലികോം നിരക്കുകള്‍ക്ക് മൂക്കുകയറിട്ടതും. കുറഞ്ഞ നിരക്കില്‍ ഡേറ്റ പ്ലാനുകള്‍, സൗജന്യ വോയിസ് കോളുകള്‍, സൗജന്യ സംഗീതം, സൗജന്യ സിനിമകള്‍ തുടങ്ങി നിരവധി ആനുകൂല്യങ്ങള്‍ ഉപയോക്താക്കള്‍ക്ക് ജിയോ ഉറപ്പുവരുത്തുന്നുണ്ട്.